काठमाडौं । अखिल (क्रान्तिकारी) ले काठमाडौँस्थित ब्रिटिश कलेजले शैक्षिक क्षेत्रमा गम्भीर अनियमितता गरेको आरोप लगाउँदै कडा आपत्ति जनाएको छ । सोमबार जारी विज्ञप्तिमा संगठनले विदेशी विश्वविद्यालयबाट सम्बन्धन प्राप्त कलेजहरूमा बढ्दो विकृति र विसङ्गतिप्रति ध्यानाकर्षण गराउँदै ब्रिटिश कलेजले Hospitality Business Management लगायतका शैक्षिक कार्यक्रमहरू अवैध रूपमा सञ्चालन गरेको आरोप लगाएको छ । कलेजले विद्यार्थी र अभिभावकलाई झुक्याउने, अत्यधिक शुल्क असुल्ने तथा घोषणा गरिएका पाठ्यक्रमभन्दा फरक कोर्स पढाएको दाबी संगठनको छ । विज्ञप्तिअनुसार भर्ना गरिएका केही विद्यार्थीलाई अध्ययनका नाममा संयुक्त अरब इमिरेट्स (युएई) पठाई अलपत्र पारिएकोसमेत उल्लेख गरिएको छ । यसबाट विद्यार्थीहरूको भविष्य गम्भीर जोखिममा परेको संगठनको भनाइ छ । अखिल (क्रान्तिकारी) ले कलेज प्रशासनले समस्याबारे आवाज उठाएका विद्यार्थीलाई धम्काउने र त्रसित बनाउने कार्य गरिरहेको आरोप पनि लगाएको छ । यस्तो व्यवहार अस्वीकार्य भएको भन्दै संगठनले कडा निन्दा गरेको छ ।
संगठनले पीडित विद्यार्थीलाई तत्काल न्याय दिन, कलेजले गरेको भनिएको शैक्षिक लुटधन्दामाथि निष्पक्ष छानबिन गरी दोषीमाथि कडा कारबाही गर्न शिक्षा मन्त्रालयसहित सम्बन्धित निकायसँग माग गरेको छ । माग बेवास्ता गरिए ब्रिटिश कलेज विरुद्ध सशक्त आन्दोलन अघि बढाइने चेतावनीसमेत दिइएको छ । उक्त कलेज महँगो शुल्क असुल्ने र प्रभावकारी पढाइ नहुने आरोपका कारण विगतदेखि नै विवादमा पर्दै आएको बताइन्छ । यसअघि पनि विद्यार्थी र अभिभावकले आफूहरू ठगिएको आरोप लगाउँदै कलेज सञ्चालक महेन्द्र कडेलविरुद्ध आन्दोलन गरेका थिए । अखिल (क्रान्तिकारी) ले विदेशी सम्बन्धन प्राप्त अधिकांश कलेजहरूले विद्यार्थी ठगिरहेको आरोप लगाउँदै सरकारले प्रभावकारी नियमन गर्न नसकेको जनाएको छ । संगठनले उल्टै यस्ता कलेजबाट सरकारी कर्मचारीले कमिसन लिने गरेको गम्भीर आरोपसमेत उठाएको छ ।