काठमाडौँ । अखिल नेपाल महिला संगठनले एक महिलामाथि अभद्र व्यवहार, अश्लील टिप्पणी तथा धम्कीपूर्ण गालीगलौज गरेको आरोप लागेका राष्ट्रिय स्वतन्त्र पार्टी (रास्वपा) का सांसद खगेन्द्र सुनारमाथि आवश्यक छानबिन गरी कारबाही गर्न माग गरेको छ । संगठनकी संयोजक अञ्जना तामाङद्वारा असोज २७ गते जारी प्रेस वक्तव्यमा विभिन्न सञ्चारमाध्यममा प्रकाशित समाचारप्रति गम्भीर ध्यानाकर्षण भएको जनाइएको छ । वक्तव्यमा एक महिलासँग सांसद सुनारले गरेको भनिएको व्यवहार नेपाली समाजको संस्कार तथा नेपालको संविधानमा सुनिश्चित महिला अधिकारसम्बन्धी व्यवस्थाविपरीत रहेको उल्लेख गरिएको छ । संगठनले महिलालाई मानवका रूपमा सम्मान गर्नुको सट्टा वस्तुका रूपमा हेर्ने पितृसत्तात्मक तथा दलाल पुँजीवादी सोचका कारण यस्ता घटना हुने गरेको आरोप लगाएको छ । संविधानको धारा ३८ ले महिलाको हक सुनिश्चित गरेको उल्लेख गर्दै महिलाविरुद्ध धार्मिक, सामाजिक, सांस्कृतिक परम्परा वा अन्य कुनै आधारमा शारीरिक, मानसिक, यौनजन्य तथा मनोवैज्ञानिक हिंसा गर्न नपाइने र त्यस्ता कार्य दण्डनीय हुने व्यवस्था रहेको वक्तव्यमा स्मरण गराइएको छ ।
महिलाको अधिकार संरक्षण गर्ने संवैधानिक व्यवस्था हुँदाहुँदै पनि आरोपित सांसद सुनारमाथि कारबाही नभएको भन्दै संगठनले प्रश्न उठाएको छ । वक्तव्यमा संसदीय व्यवस्था उत्पीडित वर्ग र श्रमिक महिलाको पक्षमा नरहेको आरोपसमेत लगाइएको छ । अखिल नेपाल महिला संगठनले घटनाको आवश्यक छानबिन गरी आरोपित सांसद सुनारमाथि यथाशीघ्र कानुनी कारबाही अघि बढाउन सम्बन्धित निकायसँग माग गरेको छ ।