काठमाडौं, असोज ९ । नेपाल कम्युनिस्ट पार्टी (बहुमत) ले जनक्रान्तिका महान शहिद कृष्ण भण्डारी निरन्तरका बुबा लीलबहादुर पुनको निधनप्रति दुःख व्यक्त गरेको छ । पार्टीका अनुसार बागलुङको ढोरपाटन नगरपालिका–६ स्थित आफ्नै निवासमा असोज ६ गते ८२ वर्षको उमेरमा पुनको निधन भएको हो । पार्टीले पुनको निधनले आफूहरूलाई स्तब्ध बनाएको जनाएको छ । पार्टीका महासचिव दीपकद्वारा जारी शोक वक्तव्यमा दिवंगत पुनप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति गहिरो समवेदना व्यक्त गरिएको छ । वक्तव्यमा पुनले आफ्नो जीवनको लामो समय कम्युनिस्ट आन्दोलनमा योगदान दिएको उल्लेख गर्दै उहाँको योगदानलाई पार्टीले स्मरण गरिरहने बताइएको छ । परिवारका अन्य सदस्यलाई समेत कम्युनिस्ट आन्दोलनमा लाग्न प्रेरित गर्ने पुनको योगदानलाई नेपाली क्रान्तिकारी आन्दोलनले सम्मानपूर्वक स्मरण गर्ने पार्टीले जनाएको छ ।