अनन्त केसी (जित)
प्रारम्भ
हाम्रो पार्टी नेपाल कम्युनिस्ट पार्टी(बहुमत)को ९औं केन्द्रिय समितिको चौथो पुर्ण बैठकले पछिल्लो विकसित राष्ट्रिय र अन्तरास्ट्रिय परिस्थितिको ठोस विश्लेषण सहित नेपालको पछिल्लो आवश्यकतालाई केन्द्र भागमा राखेर जनसंविधानका लागि जनसंघर्ष अभियान संचालन गर्ने घोषणा गरेको छ । यो अभियानले विभिन्न १७ वटा उदेश्यहरु पूरा गर्ने लक्ष्य लिएको छ । साथै यो अभियानले पार्टी महाधिवेशनमा पार्टीले अगाडि सारेको ५ पुनर्गठनको उद्देश्यलाई समेत पूरा गर्दै अधुरो र अपुरो नेपाली क्रान्तिलाई सम्पन्न गर्ने प्रतिबद्धता गरिएको छ । हामीले यो अभियानलाई नेपाली क्रान्ति सम्पन्न गर्ने महत्त्वपूर्ण जगको रूपमा स्थापित गर्न देशभर घनिभुत रूपमा संचालन गर्नुपर्ने छ । वर्तमान कथित २०७२को जनविरोधी एवम् राष्ट्रविरोधी संविधानको खारेजी गर्दै राष्ट्रियता, जनतन्त्र, जनअधिकार र वैज्ञानिक समाजवादको सुनिश्चितता गर्ने नेपाली जनता र नेपाललाई केन्द्रमा राखेर जनताको आफ्नै जनसंविधान निर्माण गर्नु र नयाँ शिराबाट देश र जनताको भविष्यलाई सुनिश्चित गर्नुपर्ने ऐतिहासिक अभिभारा पूरा गर्न यो अभियानद्वारा नयाँ क्रान्ति (वैज्ञानिक समाजवादी)को आधार तयार गर्नैपर्ने आवश्यकता छ ।
जनसंविधानका लागि जनसंघर्ष सुस्ता–सिस्ने अभियान नै किन ?
जसंविधानका लागि जनसंघर्ष अभियानलाई ५नं ब्युरोको राप्ती/लुम्बिनी क्षेत्रको भौगोलिक अवस्थिति, यहाँको मौलिकता, विशिष्टता, जनआकंक्षा र अन्तरविरोधलाई केन्द्रमा राखेर “जनसंविधानका लागि जनसंघर्ष सुस्ता–सिस्ने अभियान” सन्चालन गरिएको छ । साबिकको राप्ती र लुम्बिनी क्षेत्रका ११ वटा जिल्लाहरु यस ब्युरो भित्र पर्दछन । जसमा नवलपरासी सुस्ता पश्चिम्, रुपन्देही, गुल्मी, पाल्पा, अर्घाखाँची, कपिलवस्तु, दाङ, रोल्पा, सल्यान , प्युठान र रुकुम पर्दछन । यस ब्युरोको क्षेत्रफल २०६०१.४९ वर्ग किमि रहेको छ । २०७८को जनगणना अनुसार यस क्षेत्रको जनसंख्या ३८,८१,२५३ भएको तथ्यांक कार्यालयमा उल्लेख छ । यो क्षेत्र भित्र मिश्रीत जातजाति, भाषाभाषी र धर्मावलम्बीहरुको बसाई छ । यहाँ ब्राह्मण, दलित, थारु, क्षेत्री र मगर मुख्य जातिहरु हुन् । हिन्दुहरुको बाहुल्य रहेको भएतापनी यहाँ बौद्ध, इस्लाम, इसाई र प्रकृति पुजक धर्मावलम्बीहरु पनि छन् । प्रायः धेरै जनसमुदाय नेपाली भाषा बोल्ने गर्दछन भने थारु र मगर समुदाय आफ्नै भाषामा पनि बोल्ने गर्छन् । बौद्ध धर्मका संस्थापक गौतम बुद्धको जन्मथलो लुम्बिनी पनि यसै क्षेत्र भित्र पर्दछ । ५,८४९ मिटर अग्लो सिस्ने हिमाल यसै क्षेत्र भित्र रुकुममा अवस्थित छ । भारतले १४,८६० हेक्टरभन्दा बढी नेपाली भूमि मिचेको सुस्ता क्षेत्र पनि यहि ब्युरोमा रहेको छ । उत्तरी छिमेकी चिनसँग सिमा नजोडिएका दुई ब्युरोहरु (२नं र ५नं) मध्य एक ५ नं ब्युरो(राप्ती/लुम्बिनी) एक हो । ऐतिहासिक महान जनयुद्धको उद्गम जिल्ला रुकुम र रोल्पा पनि यहि ब्युरो भित्र छन् । प्राकृतिक सुन्दरता, भौगोलिक विशिष्टता, ऐतिहासिक पृष्ठभुमिका हिसाबले मात्रै होइन जनसंघर्ष/वर्ग संघर्षको हिसाबले पनि यो ब्युरोको इतिहास गौरवपुर्ण छ । यहाँको आर्थिक जीवन कृषी, साना तथा मझौला व्यापार र वैदेशिक रोजगार (रेमिट्यान्स) मा निर्भर छ।आज पनि असमानता, विभेद, गरिबी , अशिक्षा, अस्वास्थ्य र बेरोजगारीताले यस क्षेत्रलाई लपेटिरहेकै छ ।
५नं ब्युरोका यिनै विशेषता र अन्तरविरोधलाई राष्ट्रिय आवश्यकता र आकांक्षा सँग जोडेर हेर्दा मुलतः राष्ट्रिय स्वाधीनताको रक्षा (सिमा) र भारतीय हस्तक्षेपबाट स्वतन्त्रता खोजिरहेको सुस्ता तथा विजयको सन्निकट पुगेर गर्ल्याम्म ढलेको वर्गीय आन्दोलनको नयाँ पुनर्गठनको माग र खोजी गरिरहेको जनयुद्धको आरम्भ र तुफानी केन्द्र रुकुम र रोल्पा सम्मको जनताको चाहाना र भावनालाई एउटै डोरीले बाँधेर अगाडि बढ्नुपर्नेछ । अझै पनि गरिबी, असमानता, अविकास, अशिक्षा, अस्वास्थ्य, बेरोजगारी र विभेदहरु बाट गुज्रिएको सुस्ता देखि सिस्ने सम्मको किसान, मजदुर, जातीजनजाति, दलित, महिला र युवा विद्यार्थीहरुलाई नयाँ वर्गीय आन्दोलनको पुनर्गठन र सफलताले मात्रै तमाम साङ्लोहरु बाट मुक्त गर्नेछ भने सन् १८१६ को सुगौली सन्धी देखि यता निरन्तर राष्ट्रिय मुक्ति र स्वाधीनताको लडाइँ लडिरहेको र मुक्ति र स्वतन्त्रता खोजीरहेको सिङ्गो नेपाल र नेपालीको प्रतिविम्बको रूपमा यो भुमीमा टेक्दै गर्दा सुस्ताले प्रतिनिधित्व गर्दछ । राष्ट्रिय स्वाधीनता र नयाँ वर्ग संघर्षको पुनर्गठन र थालनी तथा त्यसको अनिवार्य विजयले मात्रै देश शान्ति, स्वाधीनता, समृद्धि, विकास, समानता, राजनीतिक स्थिरता र न्यायपुर्ण मार्गमा अगाडि बढ्नेछ । अर्थात् स्वाधीन संयुक्त सरकार गठन गर्दै त्यसले आफ्ना कार्यभारहरु पूरा गरेर नेपालबाट एक्काइसौं शताब्दीको यो युगमा दुनियाँ माझ वैज्ञानिक समाजवादको रातो झण्डा फहराउने छ।नेपाल दलाल पुजीवाद र साम्राज्यवादको पन्जाबाट मुक्त हुनेछ ।

जनसंविधानका लागि जनसंघर्ष सुस्ता–सिस्ने अभियानको आवश्यकता र महत्त्व के छ ?
अभियानको शुरूवातमै हाम्रो पार्टी निकट कम्युनिस्ट युवा संगठन नेपालले जिम्मेवारी लिने गरि राष्ट्रिय आवास कम्पनीको कार्यालय नवलपरासीका भ्रष्ट प्रमुख महेन्द्र थापा माथी कालोमोसो दलेर गरेको कारबाही र नेपाल संस्कृत विश्वविद्यालयका उपकुलपति माथी विद्यार्थी संगठन अखिल (क्रान्तिकारी) द्वारा गरिएको कारबाही अर्थपूर्ण रहेका छन् । नयाँ वर्ग संघर्षको पुनर्गठनकै प्रक्रियामा पार्टीले भन्दै आएको पहिलो चरण जनसंघर्षको चरणलाई मद्दत पुर्‍याएको छ । राष्ट्रिय स्वाधीनताको पक्षमा, भ्रष्टाचारको विरुद्ध, वित्तीय शोषणका विरुद्ध लगायत तमाम राष्ट्रियता, जनतन्त्र र जनजीवन सँग जोडिएका बिषयमा जनसंघर्षलाई नयाँ उचाइमा उठाउने, जनसंघर्षकै प्रक्रियामा क्रान्तिका तयारीहरु (वैचारिक तथा राजनीतिक, संगठन, आर्थिक, संघर्ष, प्राविधिक , प्रचारप्रसार एवम् अन्तराष्ट्रिय) पूरा गर्दै पुरानो राज्यसत्ताद्वारा थोपारिने दमन, धरपकड, पक्राउ र ज्यादतीका विरुद्ध जनप्रतिरोध आन्दोलनको तयारी गर्ने र प्रतिरोध आन्दोलनलाई सशक्त जनविद्रोहमा रुपान्तरण गर्ने र पुरानो जनविरोधी दलाल पँुजीवादी सत्ताको अन्त्य गरी वैज्ञानिक समाजवादी सत्ताको स्थापना गर्ने महान एवम् युगीन आन्दोलनको निति जनसंविधानका लागि जनसंघर्ष सुस्ता–सिस्ने अभियानको अत्यन्त आवश्यकता र महत्व रहेको छ । २१औं शताब्दीमा विश्व श्रमजीवी वर्गको मुक्ति आन्दोलनको हिस्सा नेपाली कम्युनिस्ट आन्दोलनलाई सफलता र विजयमा पुर्‍याउने नेपाली समाजको मौलिकताको “लम्बे अभियान” बनाउने, जनयुद्धको अभियान सँग जोडेर हेर्दा “सिज अभियान“को उचाइमा उठाउने आकांक्षा हामीले लिएका छौँ । सिङ्गो पार्टी पङ्ती, जवसहरु र क्रान्तिकारी जनसमुदायको साथ, सहयोग र समर्थनले हामी यो अभियानलाई सफल बनाउनेमा विश्वस्त छौँ । हामी हाम्रो पार्टीको तर्फबाट राप्ती/लुम्बिनी क्षेत्रका सम्पुर्ण कम्युनिस्ट, वामपन्थी, माओवादी, देशभक्त, सच्चा लोकतान्त्रिक शक्तिहरु, प्रगतिशील एवं सम्पुर्ण बुद्धिजीवी, व्यापारी, व्यवसायी, युवा, विद्यार्थी, किसान, मजदुर, उत्पीडित जातजाती र समुदाय तथा सम्पुर्ण जनसमुदायमा यो अभियानमा जोडिन र आवश्यक सहयोग र सहभागिता जनाउन अपिल पनि गर्दछौं ।