काठमाडौं । निजामती कर्मचारी विधेयकमा भएको जालसाजीका कारण संसद, सांसद र सरकामाथि नै यतिबेला नैतिक प्रश्न उठेको छ । निजामती कर्मचारी विधेयकमा कुलिङ पिरियडमा भएको छेडखानीको विषयमा संसदको राज्य व्यवस्था तथा सुशासन समितिको बैठकमा निकै चोटिला प्रश्नहरु उठेका छन् । दलहरुबीच यसविषयमा कडा टिप्पणीहरु भइरहेका छन् ।
यसैबीच नेपाली कांग्रेसका सांसद हृदयराम थामीले शुसासन समितिका सभापति रामहरि खतिवडा र सचिव सुरजकुमार दुरामाथि प्रश्न उठाएका छन् । उनले समितिका सभापति टाठोबाठोमध्येको भएकाले थाहा पाइनँ भनेर सुख नपाइने बताए । सभापति खतिवडा पनि कांग्रेसकै सांसद हुन् ।

‘दुराजी तपाईं सचिव हो । नयाँ मान्छे होइन । सभापति टाढोबाठोमध्येको सभापति हो, थानीले आक्रोश पोखे, ‘कुलिङ पिरियडमा थाहा छैन भनेर तपाईंले थाहा पाइन भन्न मिल्छ ?’

यो प्रकरणले सिंगो संसदको अपमान भएको र सांसदहरूको मन रोएको थानीले बताए । ‘यहाँ ठूलै समूहको हात छ । सांसदको मन रोएको छ । भोलि पार्लियामेन्ट सिस्टमको के रहला ?’ उनले प्रश्न गरे । उनले कोर टिम भनेको को हो भन्ने प्रश्न पनि उठाए । ‘इमानदार साथ भन्नुस्, कोर टिम को हो ? तपाईं र दुरापछि कांग्रेस, एमालेबाट कसलाई राख्नुभएको थियो ?’ थानीले प्रश्न गरे ।

समिति सभापति खतिवडाले नपढेरै हस्ताक्षर गरेको भन्ने आफूलाई विश्वास नलागेको थानीले बताए । ‘कम्तिमा संसदीय समिति गठन हुनुपर्छ । सभापतिले मनपरी गर्नुभयो । हाम्रो चित्त दुखाउनुभयो । तपाईंले नपढेर सिग्नेचर गर्नुभएको भन्ने मेरो मनमा छैन,’ थानीले भने ।

थानीले दुरालाई थप अगाडि भने, ‘दुराजी तपाईंले ठूलाका दबाबमा ५ (क) राख्नुभएको हो । सानो समितिले हुँदैन ।’
यो विषयले संसदीय दलहरुको बीचमा अविश्वास र बेचैन पैदा गरिदिएको छ र संसदीय व्यवस्था ठालुहरुले मनपरी गर्ने व्यवस्था हो भन्नेहरुलाई हौसला दिएको छ । संसदीय व्यवस्थामा भन्ने एउटा र गर्ने अर्कै हो भन्ने फेरि एकपटक छर्लङ्ग भएको छ ।