काठमाडौं, असार २६ – हालै रसुवाको भोटेकोशी क्षेत्रमा आएको विनाशकारी बाढी र पहिरोका कारण ठूलो जनधनको क्षति भएकोप्रति नेपाल कम्युनिस्ट पार्टी (बहुमत) ले गहिरो दुःख व्यक्त गरेको छ । पार्टी महासचिव कञ्चन द्वारा जारी प्रेस वक्तव्यमा विपतमा परी ज्यान गुमाउनेहरूप्रति भावपूर्ण श्रद्धाञ्जली अर्पण गर्दै घाइतेहरूको शीघ्र स्वास्थ्य लाभको कामना गरिएको छ । पार्टीले यो विपद्ले मुलुकलाई थप पीडा र संकटतर्फ धकेलेको उल्लेख गर्दै राज्य संयन्त्रलाई तुरुन्त सक्रिय र प्रभावकारी ढंगले परिचालन गर्न आग्रह गरेको छ ।
वक्तव्यमा भनिएको छ, अप्रत्यासित रूपमा रसुवा भोटेकोशी क्षेत्रमा आएको बाढीले दर्जनौँ मानिसको ज्यान लिएको छ भने विद्युत् सबस्टेशनसहित ठूलो मात्रामा भौतिक सम्पत्ति नष्ट भएको छ । कतिपय स्थानमा अविरल वर्षाका कारण सडक अवरुद्ध भएका छन्, जसले जनजीवन कष्टकर बनाएको छ । पार्टीले विशेष रूपमा चीनको तिब्बत क्षेत्रमा रहेको हिमताल विष्फोटका कारण ल्हेन्दे खोलामा आएको बाढीले नेपालतर्फ जनधनको क्षति गराएको भन्दै यस्ता घटनाको सूचना समयमै उपलब्ध गराउने व्यवस्था मिलाउन नेपाल सरकारले चिनियाँ पक्षसँग समन्वय गर्नुपर्ने माग राखेको छ ।
वर्षायाममा यस्ता प्राकृतिक विपत्तिहरूको जोखिम अझै बढ्ने भएकाले बाढी–पहिरो प्रभावित क्षेत्र र सम्भावित जोखिमयुक्त क्षेत्रहरूमा पूर्वतयारीसहितको सतर्कता अपनाउन सरकारले ठोस योजना बनाई कदम चाल्नुपर्ने पार्टीको भनाइ छ । यसैगरी पार्टीले विपद्को अवस्थामा रहेका जनतासँग हातेमालो गर्दै उद्धार, राहत र सहयोगमा सक्रिय सहभागिता जनाउन आफ्ना सम्पूर्ण पार्टी पंक्ति र कार्यकर्ताहरूलाई निर्देशनसमेत दिएको छ ।