काठमाडौं । नेकपा (बहुमत) निकट विद्यार्थी संगठन अखिल क्रान्तिकारीले आफ्नो संगठनको गण्डकी प्रदेश संयोजक राजन साउन र कास्की जिल्ला अध्यक्ष बासुदेव बुढालाई कास्की प्रहरीले गिरफ्तार गरेकोप्रति भ्रत्सर्ना गर्दै दुवै नेतालाई तत्काल रिहा गर्न माग गरेको छ ।

सो संगठनका केन्द्रीय अध्यक्ष वीरेन्द्र शाहले आज एक विज्ञप्तिमार्फत् उनीहरुको रिहाइको माग गरेका हुन् । विज्ञप्तिमा शाहले पोखराको छोरेपाटन माविका व्यवस्थापन समितिका अध्यक्ष बद्रिनाथ पहारीलाई पाताले छाँगोमा कमिसन खाएर निजी कम्पनीलाई ठेक्कामा दिएको र सोही ठेक्कामा भएको भ्रष्टाचारका कारण अध्यक्ष पहारीलाई चेतावनी स्वरुप कालोमोसो दलेको घटनााई लिएर आफ्नो संगठनका नेताहरुलाई पक्राउ गरी दुःख दिइएको भन्दै उनीहरुलाई तत्काल रिहा गर्न माग गरेका हुन् ।

विज्ञप्तिमा शक्तिको आडमा विद्यालयको सम्पति दोहन गर्न बन्द गर्न चेतावनी दिइएको छ । साथै विज्ञप्तिमा अध्यक्ष शाहले पाताले छाँगो निजी कम्पनीलाई जिम्मा लगाउने गरी भएको सम्झौता अविलम्ब खारेज गर्न र सो आयस्रोतलाई विद्यालयको आयस्रोत बनाउनु पर्ने र अन्यथा माफिया, दलाल र भ्रष्टाहरुमाथि जस्तोसुकै कारवाही गर्न आफ्नो संगठन तयार रहेको चेतावनी पनि दिएका छन् ।