काठमाडौं । जनपक्षीय शिक्षा ऐन जारी गराउन बृहत विद्यार्थी प्रदर्शनको कार्यक्रम स्थल माइतीघर मण्डलाबाट नेकपा (बहुमत) निकट अखिल (क्रान्तिकारी)का केन्द्रीय उपाध्यक्ष रुपा बुढामगर सहित १० जना गिरफ्तार परेका छन् । गिरफ्तार हुनेहरुमा

रुपा बुढामगर, सर्जन पाण्डे, लक्ष्मी शाह, आयुश घिमिरे, सक्षम विश्वकर्मा, बजिर सिंह नेपाली, समीर विक, सुप्रिया नेपाली, सन्जु राई, पदम हमाल रहेका छन् ।

माइतीघर मण्डलादेखि बानेश्वरसम्म प्रदर्शन गर्ने कार्यक्रम रहेपनि माइतीघरमा जम्मा हुँदै गरेका विद्यार्थीहरुलाई प्रहरीले धरपकड गरी विद्यार्थी नेताहरुलाई गिरफ्तार गरेको हो । समान शिक्षा, वैज्ञानिक र निशुल्क शिक्षासहितको शिक्षा ऐन जारी गरिनु पर्ने माग राखी विद्यार्थीहरुले शान्तिपूर्ण रुपमा प्रदर्शन गर्दा गिरफ्तारी र धरपकड गर्नु राज्यले अन्याय गरेको भन्दै सामाजिक संजाल तथा संचारमाध्यमहरुमा ओली सरकारको विरोध भइरहेको छ ।

अखिल क्रान्तिकारीका विद्यार्थी नेताहरुले प्रहरीले विद्यार्थी पोशाकमा किन आन्दोलनमा आएको ? भन्दै विद्यार्थीहरुलाई धरपकड गरेको प्रतिकृया दिएका छन् । सरकारले शिक्षा ऐन जारी गर्ने तयारी गरिरहेको छ । सोही ऐनमा शिक्षा समान, निःशुल्क र वैज्ञानिक हुनु पर्ने कुरामा दबाब दिन विद्यार्थी संगठनहरुको नेतृत्वमा दिनहुँ प्रदर्शनहरु भइरहेका छन् ।