काठमाडौं । धर्मेन्द्र बास्तोला नेतृत्वको नेकपा (बहुमत) निकट विद्यार्थी संगठन अखिल (क्रान्तिकारी)ले आह्वान गरेको आम शैक्षिक हड्तालका कारण आज केही विद्यालय र कलेजहरु बन्द भएका छन् ।

क्रान्तिकारीले निःशुल्क शिक्षाको सुनिश्चितता हुनुपर्ने, शिक्षामा भइरहेको निजीकरण बन्द हुनुपर्ने र शिक्षा ऐन छिटो जारी गर्नुपर्ने लगायतका मागसहित आज एकदिन आम शैक्षिक हड्ताल घोषणा गरेको हो ।

हड्ताल घोषणा गरेका कारण काठमाडौं उपत्यका भित्र र बाहिरका जिल्लाहरुमा विद्यालयहरु बन्द छन् । काठमाडौंका कतिपय निजी विद्यालयहरु विहीबार बेलुका अभिभावकहरुलाई एसएमएस पठाएर विद्यालय बन्द हुने जानकारी गराएका थिए । केहीले भने आन्तरिक परीक्षा संचालन गरिरहेकाले विद्यालय खुला राखेका छन् ।