काठमाडौं । नेकपा (बहुमत) निकट अखिल क्रान्तिकारीले आज साउन २ गते आयोजना गरिएको आम शैक्षिक हडताल सफल पार्न सहयोग गर्ने र ऐक्यवद्धता जनाउने सबैप्रति आभार प्रकट गरेको छ ।

सो संगठनका अध्यक्ष वीरेन्द्र शाहले आज एक विज्ञप्तिमार्फत् निःशुल्क शिक्षाको माग राखेर ज्ञापनपत्र बुझाउँदा पनि सरकारले बेवास्ता गरेपछि र माग पूरा गर्नुको साटो उल्टै दमनमा उत्रिएपछि आफूहरु हड्ताल गर्न बाध्य भएको भन्दै हड्ताल सफल पार्न सहयोग गर्ने विद्यार्थी र शैक्षिक संस्थाहरुलाई धन्यवाद पनि दिएका छन् ।

अध्यक्ष शाहले विज्ञप्तिमा निःशुल्क, समान र वैज्ञानिक शिक्षाको कार्यान्वयन हुनेगरि यथाशीघ्र जनपक्षीय शिक्षा ऐन जारी गर्न सरकारसँग जोडदार माग पनि गरेका छन् ।

यस्तो छ शाहले जारी गरेको विज्ञप्ति :

ऐक्यबद्धताका लागि धन्यवाद ।
नेपालको क्रान्तिकारी विद्यार्थी आन्दोलनको अग्रदस्ता आम नेपाली जनसमुदायको आशाको केन्द्र र विद्यार्थीहरुको प्रिय संगठन अखिल (क्रान्तिकारी) शिक्षा क्षेत्रमा आम शैक्षिक सुधार सहित वैज्ञानिक समाजवादी शिक्षा प्राप्तिका लागि निरन्तर संघर्षरत रहेको छ ।
अहिले देशको शिक्षा प्रणाली २०२८ सालमा लागू भएको ५४ वर्ष पुरानो पञ्चायती शिक्षा ऐनबाट चलिरहेको छ । शिक्षामा निजीकरण र व्यापारीकरणले गर्दा शिक्षा आम नागरिकको पहुँचबाट टाढा भएको छ । सबै नागरिकहरुले निःशुल्क, समान र वैज्ञानिक शिक्षा प्राप्त गर्नु मौलिक हक र नैसर्गिक अधिकार हो । शिक्षालाई मौलिक अधिकारको रूपमा संवैधानिक व्यवस्था गरेको भएपनि कार्यान्वयनमा शिक्षा क्षेत्रमा पैसा हुने र नहुनेका वीचमा चरम विभेद छ । नेपालको संविधान, २०७२ को मौलिक हक (धारा ३१) मा प्रत्येक नागरिकलाई आधारभूत तहसम्मको शिक्षा अनिवार्य र निःशुल्क तथा माध्यमिक तहसम्मको शिक्षा निःशुल्क पाउने हक हुनेछ भनिएको छ । यसबारे राज्य गम्भीर नभई शिक्षामा निजीकरण र व्यापारीकरणलाई नै प्रोत्साहन गरिरहेको तितो यथार्थ तपाई हामी सामु छर्लङ्ग छ । शिक्षालाई व्यापार र शिक्षण संस्थाहरुलाई व्यापार गर्ने थलो नबनाउन तथा जनविरोधी एवं नवउदारवादी शिक्षा नीति लागू गर्नेगरि शिक्षा ऐन जारी गर्ने षड्यन्त्रका तानाबाना नबुन्न सरकारलाई हामीले पटकपटक सचेत गराएका छौं । तर हामीले गरेको रचनात्मक एवम् सिर्जनशील आन्दोलनप्रति सरकार गम्भीर बनेन, निःशुल्क शिक्षाको कुरा सुन्नै चाहेन । यसर्थ, हाम्रो संगठन आन्दोलनकै निरन्तरताका रुपमा देशव्यापी शैक्षिक हड्तालमा जान बाध्य भयो । र आज साउन २ गते देशैभर शैक्षिक हड्तालको कार्यक्रम आयोजना गरिएकोमा हड्ताल देशभर भव्य र सानदार रुपले सम्पन्न भएको छ । यस कार्यक्रमलाई सफल पार्न सहयोग गर्नुहुने तथा ऐक्यबद्धता जनाउनुहुने सम्पूर्ण विद्यार्थी साथीहरु, अभिभावक, शिक्षक तथा कर्मचारीहरु, शिक्षण संस्थाहरु लगायत सहयोग गर्नुहुने सुरक्षाकर्मी र पत्रकार मित्रहरुप्रति हार्दिक आभार सहित धन्यवाद ज्ञापन गर्दछौं ।
अन्त्यमा, निःशुल्क, समान र वैज्ञानिक शिक्षाको कार्यान्वयन हुनेगरि यथाशीघ्र जनपक्षीय शिक्षा ऐन जारी गर्न सरकारसंग जोडदार माग गर्दछौं । र संगठनले सञ्चालन गरिरहेको उक्त अभियानमा ऐक्यबद्धता जनाउन हुन सम्बन्धित सम्पूर्णलाई हार्दिक आव्हान गर्दछौं ।
क्रान्तिकारी अभिवादन सहित !
क. वीरेन्द्र शाह
अध्यक्ष