काठमाडौँ । नेपाल कम्युनिस्ट पार्टी (बहुमत) ले भूमाफियाहरुसँग मिलेर भ्रष्टाचार र जनतालाई अनावश्यक दुःख दिने नापी कार्यालयका प्रमुख शालिकराम लम्साललाई कालोमोसो दलेको छ । मङ्गलबार नेकपा (बहुमत) चितवनको खैरहनी नगर कमिटी सेक्रेटरी ज्वालाले प्रेस वक्तव्यमार्फत नगरपालिकाभित्र रहेको नापी कार्यालयका प्रमुख शालिकराम लम्साललाई कार्यकक्षमै कालो मोसो दलेको जानकारी गराएका छन् । साथै उनले यतिबेला राष्ट्रियता, जनतन्त्र, जनजीविकाका समस्याबाट नेपाली जनता आक्रान्त बनिरहेको अवस्थामा भूमाफियाहरूको हालीमुहाली बढ्दै गएकोले अवदेखि यस्तो गतिविधिहरू भएमा थप जनसङ्घर्षमार्फत कारवाही गर्ने चेतावनी समेत दिएका छन् ।

नगर सेक्रेटरी ज्वालाद्वारा जारी प्रेस वक्तव्यमा भनिएको छ, ‘महान् तथा गौरवशाली पार्टी नेकपा (बहुमत) दलाल संसदीय व्यवस्थाको विकृति विसंगति भ्रष्टाचार कमिसनतन्त्र भूमाफिया दलालतन्त्र, बैंक, सहकारी लघुवित्त शोषणविरुद्ध निरन्तर रूपमा जनसङ्घर्ष गर्दै आएको कुरा सबै अवगत छ । यतिबेला राष्ट्रियता, जनतन्त्र, जनजीविका समस्याबाट नेपाली जनता आक्रान्त बनिरहेको अवस्थामा भूमाफियाहरूको हालीमुहाली बढ्दै गएको छ । यस सन्दर्भमा खैरहनी नगरपालिका अन्तरगत नापी कार्यालय प्रमुख शालिकराम लम्साललाई मौखिक रुपमा पटकपटक सल्लाह दिँदा पनि कुनै सुनवाई गर्नु भएन । बाध्य भएर जनकारवाहीमा जानुपर्ने परिस्थिति उहाँ आफैँले निम्त्याउनु भयो । उहाँले भूमाफियासँग मिलेर पूर्वि चितवनको विभिन्न ठाउँको कित्ताकाट गर्ने र मोटो रकम बुझ्‌ने भूमाफियाहरूको योजनामा नमिल्ने जग्गालाई पनि कित्ताकाट गरि माफियाहरूलाई सहयोग गर्ने आम सर्वसाधारण सेवाग्राहीबाट विभिन्न शिर्षकमा रकम असुल्ने कार्यालयमा कार्यालय समयभन्दा सँधै ढिला आउँने जस्तो गतिविधि निरन्तर भएकोले खैरहनी नगर कमिटीले जनकारवाही गरेको सबैमा जानकारी गराइन्छ । यदि पुनः यस्तो गतिविधिहरू भएमा थप जनसङ्घर्षमार्फत कारवाही गरिने छ ।’