काठमाडौं । नेकपा (बहुमत)ले सवारी साधनमा सरकारले जडान गर्न अनिवार्य गर्न आदेश दिएको र इम्बोस्ड नम्बर बारेको विषयमा आफ्‌नो धारणा सार्वजनिक गरेको छ ।

सो पार्टीका महासचिव धर्मेन्द्र बास्तोलाले आज एक विज्ञप्ति जारी गर्दै इम्बोस्ड नम्बरको ठेक्का प्रकृया तत्काल खारेज गर्न माग गरेका छन् । विज्ञप्तिमा बास्तोलाले यो ठेक्कामा अर्बौं भ्रष्टाचारको खेल रहेकोले यसलाई तत्काल खारेज गर्नुपर्ने दाबी गरेका छन् ।

विज्ञप्तिमा आगामी असोज १ गतेबाट अनिवार्य लागु गर्न आमनिर्देशन जारी गरिएकोले यसको विरोध गर्न सबैलाई अपील पनि गरिएको छ ।
इम्बोस्ड नम्बर जडानको ठेक्का कालोसूचीमा परेको कम्पनीलाई दिन लागेको भन्दै बास्तोलाले यसको अन्तर्यमा जनतालाई शोषण र लुटपाट गरी मिलेमतोमा चरम भ्रष्टाचार गर्ने नियत राखेको प्रस्टै देखिएको बताएका छन् ।

‘प्रारम्भदेखि नै विवादित यो ठेक्का प्रक्रिया र यसमा संलग्न अमेरिकी डेकाटुर कम्पनीसँग जोइन्टभेन्चर गरेको बङ्गलादेशी कम्पनी टाइगर आइटी विश्वबैंकको कालोसूचिमा रहनु, विभागीय मन्त्री, महानिर्देशकहरु र कर्मचारीहरुसमेतको मिलेमतोमा १ अर्ब बढी सस्तो ठेक्का प्रक्रियामा संलग्न पिंगाओ जेकेजी कन्सोर्टियम कम्पनीलाई सुनियोजित रुपमा अयोग्य घोषणा गरेर चलखेल गरिनुले यो प्रकरणमा अर्बौंको भ्रष्टाचार भएको सहज अनुमान गर्न सकिन्छ ।’ विज्ञप्तिमा भनिएको छ ।

बास्तोलाले अख्तियारमा यसका बारेमा मुद्दासमेत दायर हुँदा पनि हालसम्म मौनता साँधिनु अनौठो कुरा भएको बताएका छन् ।
‘अर्बौ भ्रष्टाचार गर्ने उद्देश्यकासाथ अघि बढाइएको यो योजना भारत लगायतका देशहरुको तुलनामा दोब्बर, तेब्बर महंगो भएको र यसमा प्रयोग गर्ने भनिएको भाषाका बारेमा समेत आमबिरोध भइरहेको यो स्थितिमा सो ठेक्का प्रक्रिया अविलम्ब खारेज गर्न र घटनाका बारे यथाशीघ्र छानबिन गरी संलग्न भ्रष्टहरुलाई कडा कारबाही गर्न सरकार समक्ष हाम्रो पार्टी जोडदार माग गर्दछ ।’ बास्तोलाको विज्ञप्तिमा भनिएको छ ।