काठमाडौं । अमेरिकी राष्ट्रपति डोनाल्ड ट्रम्पले शुक्रबार चिनियाँ राष्ट्रपति सी चिनफिङले टिकटक सम्झौतालाई स्वीकृति दिएको बताएका छन् । यसबाट भिडियो सेयरिङ प्लेटफर्मले अमेरिकामा आफ्नो काम जारी राख्नसक्ने बताएका छन् ।

ट्रम्पले ओभल अफिसमा पत्रकारहरूसँग राष्ट्रपति सीसँग राम्रो कुराकानी भएको र उनले टिकटक सम्झौतालाई स्वीकृति दिएको बताए ।
यो सम्झौता पूरा हुने प्रतीक्षामा रहेको र यसमा हस्ताक्षर गर्नुपर्ने औपचारिकता मात्र बाँकी भएको उनले बताए । टिकटक सम्झौता चाँडै हुने भन्दै लगानीकर्ताहरूले तयारी गरिरहेको उनले बताए ।

ट्रम्पले यसलाई अमेरिकाका लागि धेरै राम्रो सम्झौता भएको बताए । उनले अमेरिकाको यो एपमा कडा नियन्त्रण हुने पनि बताए ।
अमेरिकाले यसअघि एउटा कानुन पारित गरेको थियो, जसअन्तर्गत चिनियाँ कम्पनी बाइटडान्सले टिकटकको अमेरिकी हिस्सा बेच्नुपर्ने थियो । अन्यथा १९ जनवरी २०२५ देखि एपमाथि प्रतिबन्ध लाग्ने थियो । तर, ट्रम्प सरकारले अहिलेसम्म यसलाई लागु गरेको छैन ।

सी र ट्रम्पको कुराकानी लगत्तै बाइटडान्सले विज्ञप्ति जारी गर्दै राष्ट्रपति सी र ट्रम्पलाई धन्यवाद दिएको छ । टिकटकले अमेरिकामा प्रयोगकर्ताहरूलाई सेवा जारी राख्ने र चिनियाँ कानुन अनुसार आवश्यक कदम उठाउने पनि बताएको छ ।

मिडिया रिपोर्टका अनुसार यो सम्झौता अन्तर्गत अमेरिकी लगानीकर्ताहरूले टिकटकमा ८० प्रतिशत हिस्सा लिनेछन् । बाँकी २० प्रतिशत चिनियाँ कम्पनीहरूसँग रहनेछ । यसमा बाइटडान्स पनि समावेश छ ।