काठमाडौं । क्रान्तिकारी कम्युनिष्ट पार्टी तथा संगठनहरुले संयुक्त पत्रकार सम्मेलन गर्दै नोकरशाही दलाल पूँजीवादी व्यवस्थाको अन्त्य र स्वाधिन संयुक्त सरकार निर्माणको आह्वान गरेका छन् । असोज १२ गते रिपोर्टसकलब भृकुटीमण्डपमा आयोजना गरिएको संयुक्त पत्रकार सम्मेलनमा पार्टीहरुले देशमा फैलिएको भ्रष्टाचार, महंगी, बेरोजगारी, शिक्षामा नीजिकरण र उद्योग बन्दजस्ता समस्याको कारण वर्तमान दलाल सत्तालाई ठहर गरेको छ ।

संयुक्त वक्तव्यमा जेन–जी आन्दोलनलाई जनअसन्तोषको ऐतिहासिक विस्फोट भनिँदै त्यसको मागलाई वेवास्ता गरेर प्रतिक्रियावादी सरकार गठन गरिएको आरोप लगाइएको छ । पार्टीहरूले साम्राज्यवादी सम्झौताहरू (एमसीसी, एसपीपी आदि) खारेज गर्न, संसदीय व्यवस्था अन्त्य गरी जनसंविधान निर्माण गर्न, जनहत्या र भ्रष्टाचारका जिम्मेवारलाई कारबाही गर्न माग गरेका छन् ।

अन्ने मागहरुमा राष्ट्रिय स्वाधिनताको रक्षा र साम्राज्यवाद–विस्तारवादको प्रतिरोध, जेन–जी आन्दोलनका अग्रगामी राजनीतिक मुद्दा सम्बोधन, संसदीय व्यवस्था खारेज गरी जनसंविधान निर्माणको प्रक्रिया सुरु, जनहत्याका जिम्मेवारहरूमाथि कारवाही, भ्रष्टाचारीको सम्पत्ति जफत गरी राष्ट्रियकरण, शिक्षा र स्वास्थ्यमा नीजिकरण अन्त्य गरी निशुल्क व्यवस्था, राजबन्दी तथा मिटरव्याज पीडितहरूको रिहाइ, किसान, मजदुर, सुकुम्बासी र घरबारविहीनका समस्या समाधान, राष्ट्रिय उद्योग सञ्चालनको नीति लागू र स्वाधीन संयुक्त सरकार निर्माण रहेका छन् ।

पत्रकार सम्मेलनमा नेपाल कम्युनिष्ट पार्टी (बहुमत), क्रान्तिकारी कम्युनिष्ट पार्टी नेपाल, वैज्ञानिक समाजवादी कम्युनिष्ट पार्टी नेपाल, नेपाल कम्युनिष्ट पार्टी (क्रान्तिकारी), समाजवादी कम्युनिष्ट पार्टी नेपाल, ग्रेटर नेपाल कम्युनिष्ट पार्टी, श्रमिक जनता पार्टी नेपाल, रेडफोर्स नेपाल पार्टी लगायतका पार्टी र संगठनहरुको सहभागिता थियो ।