३० असोज, काठमाडौं । नेपालले आईसीसी टी–२० विश्वकप एसिया तथा इस्ट एसिया पेसिफिक छनोटमा शानदार प्रदर्शन गर्दै ओमानलाई ३८ रनले पराजित गरेको छ । यस जितसँगै नेपालले अपराजित यात्रा कायमै राख्दै उपाधिको नजिक पुगेको छ । बुधबार ओमानविरुद्ध टस जितेर पहिले ब्याटिङ गरेको नेपालले निर्धारित २० ओभरमा ९ विकेट गुमाउँदै १५१ रनको प्रतिस्पर्धात्मक स्कोर बनायो । ओपनर कुशल भुर्तेलले ५१ बलमा ६ चौका र २ छक्कासहित ६९ रनको उत्कृष्ट अर्धशतक प्रहार गरे । त्यस्तै आसिफ शेखले २४, गुलशन झाले २ छक्कासहित १८ तथा आदिल आलमले १६ रनको योगदान दिए ।
१५२ रनको लक्ष्य पछ्याएको ओमान २० ओभरमा ९ विकेट गुमाएर ११३ रनमा रोकियो । ओमानका विनायक शुम्लाले १९ बलमा सर्वाधिक ३२ रन बनाए भने मोहम्मद नदीमले २५ रन जोडे । नेपालका बलरमध्ये गुलशन झा उत्कृष्ट बने । उनले ४ ओभरमा २४ रन खर्चिएर ३ विकेट लिए । नन्दन यादव र सोमपाल कामीले २–२ विकेट लिएका थिए भने सन्दीप लामिछानेले १ विकेट लिए । बलिङतर्फ ओमानका नदीम खानले ४ ओभरमा २० रन दिँदै ४ विकेट लिए । शुफिया मेहमुद र जितेन रामानन्दीले २–२ विकेट लिएका थिए । यस जितपछि नेपालले ४ खेलमा ८ अंक जोड्दै तालिकाको शीर्ष स्थानमा उक्लिएको छ । नेपाल र ओमान दुवै टिम विश्वकपमा छनोट भइसकेका छन् । नेपालले यसअघि यूएई र कतारलाई पराजित गरिसकेको छ भने अब शुक्रबार सामोआसँग खेल्दै समूह चरणको अन्तिम खेल खेल्नेछ ।