काठमाडौँ । त्रिभुवन विश्वविद्यालय (त्रिवि) परिसरस्थित कीर्तिपुर अन्तर्राष्ट्रियस्तरको क्रिकेट मैदानमा फ्लडलाइटका सबै ६ वटै टावर ठड्याउने काम पूरा भएको छ । निर्माण व्यवसायीले आइतबार एकैदिन दुई वटा पोल उठाएसँगै सबै ६ पोल ठड्याइएका हुन् । मैदानमा ४५ मिटर र ६० मिटर उचाइका ३०/३० टन तौलका हाइमास्ट लाइट टावर जडान गरिएको छ । तीमध्ये पोल नं १, ४, ५ र ६ मा फ्लडलाइट आंशिक रूपमा जडान भइसकेका छन् भने बाँकी दुई टावरमा लाइट राख्ने काम सुरु हुने तयारी भइरहेको आयोजनाका प्रमुख चक्रवर्ती कण्ठले जानकारी दिए ।
ऊर्जा, जलस्रोत तथा सिँचाइ, भौतिक पूर्वाधार तथा यातायात तथा शहरी विकास मन्त्री कुलमान घिसिङले गत असोज २३ गते मैदानको अनुगमन गरेका थिए । अनुगमनका क्रममा दुवै निर्माण व्यवसायीले नेपाल प्रिमियर लिग (एनपीएल) सुरु हुनु अघि नै प्यारापेट र फ्लडलाइट जडान कार्य सम्पन्न गर्ने प्रतिबद्धता जनाएका थिए । प्यारापेट निर्माण कार्य पूरा भइसकेको छ भने फ्लडलाइट जडान अन्तिम चरणमा पुगेको छ ।
एनपीएल आगामी मङ्सिर १ गतेदेखि सुरु हुँदैछ । यसैबीच, मन्त्रिपरिषद्को असोज ३० गतेको बैठकले शहरी विकास मन्त्रालयको प्रस्तावमा कीर्तिपुर रंगशालाको गुरुयोजना स्वीकृत गर्दै आयोजनालाई राष्ट्रिय प्राथमिकता परियोजना घोषणा गरेको छ । गुरुयोजनाअनुसार करिब १० अर्ब रुपैयाँको बजेट सुनिश्चित गरी दोस्रो चरणको निर्माण कार्य अघि बढाउने निर्णय सरकारले गरिसकेको छ ।