काठमाडौँ । निर्माता तथा निर्देशक टंक बुढाथोकीले आफूले निर्माण गरेको फिल्म ‘मन बिनाको धन’ लाई केवल चलचित्र नभई एउटा अभियानको रूपमा अघि बढाइरहेको बताएका छन् । उनका अनुसार फिल्मले मनोरञ्जन सँगै समाजमा सकारात्मक सन्देश दिन खोजेको छ । बुढाथोकीले भने, “यो फिल्मले मानिसमा मन, मानवीयता र भावनाको मूल्य कस्तो हुन्छ भन्ने कुरा उजागर गर्छ । धनभन्दा मन ठूलो हो भन्ने सन्देश यसले दिन्छ,” ।
फिल्म कार्तिक २१ गतेदेखि देशभर प्रदर्शनमा आउँदैछ । यसअघि नै प्रचार–प्रसारका लागि टिमले मिडिया अन्तर्वार्ता, इ–रिक्सामा पोस्टर टाँस्ने र विभिन्न सहरहरूमा होर्डिङ बोर्ड राख्ने अभियान सञ्चालन गरिरहेको छ । ‘मन बिनाको धन’ बुढाथोकीको निर्देशन डेब्यु फिल्म हो । यसमा बाल गायक अशोक दर्जीको जीवनकथाको पेरिफेरीमा कथा बुनेको छ । बुढाथोकीकै संरक्षणमा रहेका दर्जीले गाएको ‘मन बिनाको धन ठुलो कि धन बिनाको मन’ गीतले उनको जीवनमा नयाँ मोड ल्याएको थियो । हाल दर्जी काठमाडौंमा कक्षा ९ मा अध्ययनरत छन् ।
फिल्ममा अशोक दर्जीसँगै सरोज खनाल, सन्तोष पन्त, नीता ढुंगाना, रमा थपलिया, भोला सापकोटा, बुद्धि तामाङ, रवीन्द्र झा, पार्वती अधिकारी, उत्सव सापकोटा, साम्राज्ञी थापालगायतका कलाकारको अभिनय रहेको छ । फिल्ममा संगीत टंक बुढाथोकीकै, छायांकन सौरभ लामा, सम्पादन मित्र डी. गुरुङ, र कोरियोग्राफी कविराज गहतराज तथा रामजी लामिछानेले गरेका छन् । फिल्मलाई एप्पल इन्टरटेन्मेन्ट, रीच इन्टरटेन्मेन्ट र एफडी कम्पनीले वितरण गर्ने छन् ।