लहान । छठ नजिकिँदै गर्दा देशभरका स्थानीय हाटबजारहरूमा सामग्री किनमेल गर्नेहरुको भीड बढ्न थालेको छ । लहान नगरपालिका–५ स्थित नयाँ बजारको साप्ताहिक हटियामा शुक्रबार बिहानदेखि नै छठ पूजाका लागि आवश्यक सामग्री किन्नेहरूको उल्लेख्य चहलपहल देखिएको हो । पूजाका लागि प्रयोग हुने बाँसका कोनिया, ढाकी, नाङ्लो, माटोका हात्ती, दियो लगायतका धार्मिक सामग्रीसहित केरा, नरिवल, भोगटे, उखु, हरियो बोडी, मुला, अदुवा बोट आदि किन्नेहरूको भिड लागेको स्थानीय व्यापारीहरूले बताएका छन् । छठ पर्वको तयारीका क्रममा भक्तजनहरू बिहानदेखि नै बजारमा आवश्यक सामग्री किन्न जुटेका थिए। बजारमा बाँस र माटाका सामग्री बेच्ने व्यापारीहरूलाई समेत भीड संभाल्न मुस्किल परेको देखिन्थ्यो । कात्तिक शुक्ल षष्ठीको साँझ अस्ताउँदो सूर्यलाई अर्घ्य दिने र त्यसको भोलिपल्ट बिहान उदाउँदो सूर्यलाई पुनः अर्घ्य दिएपछि छठ पूजा सम्पन्न गरिन्छ । बाँसबाट बनेका ढाकी, नाङ्लो, कोनियामा राखिएका ठकुवा, भुसुवा, केरा, नरिवल लगायतका सामग्रीसहित ब्रतालुहरूले सूर्यदेवलाई अर्घ्य दिने परम्परा रहँदै आएको छ । भक्तजनहरूले पोखरी, तलाउ र नदीकिनारमा पूजाका लागि घाट निर्माण गरी सजावट गर्ने काम पनि सुरु गरेका छन् । छठ पर्व नेपाली समाजमा विशेष गरी मधेसका जिल्लाहरूमा व्यापक रूपमा मनाइने धार्मिक र सांस्कृतिक पर्व हो ।