कात्तिक ८, काठमाडौं । स्थानीय प्रशासनको अनुमति बिना माइतीघर मण्डलमा प्रदर्शन गर्न पुगेका ५० जना ‘जेनजी युनाइटेड’ समूहका सदस्यलाई प्रहरीले शनिबार नियन्त्रणमा लिएको छ । जिल्ला प्रहरी परिसर काठमाडौंका अनुसार बिहानदेखि प्रदर्शन गर्न भेला भएका उनीहरूलाई संभावित भिडन्त र सुरक्षा जोखिमका कारण सोधपुछका लागि नियन्त्रणमा लिइएको हो। पक्राउ परेकामध्ये २४ महिला र २६ पुरुष रहेका छन् ।
प्रहरीका अनुसार स्थानीय प्रशासनबाट अनुमति नलिई प्रदर्शन गर्न खोजिएकाले उनीहरूलाई रोकिएको हो । प्रहरीले सम्भावित ‘जेनजी’ समूहबीचको मुडभेडबाट प्रदर्शनकारीकै सुरक्षा जोखिम देखिएकाले कदम चालिएको जनाएको छ । ‘जेनजी युनाइटेड’का अगुवा मदन कार्कीले आफूहरूले स्वतन्त्र रूपमा प्रदर्शन गर्न जिल्ला प्रशासन कार्यालय काठमाडौंबाट अनुमति मागेपनि नपाएको बताए । उनले भने, “हामी जेनजीहरू एकजुट हुनुपर्छ भन्ने सकारात्मक भावसहित गएको थियौं, तर प्रशासनले रोक्यो। जिल्ला प्रशासन कार्यालयले अनुमति नै दिएन ।”