काठमाडौँ, कात्तिक ९ । अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) ले मोरङको लेटाङ नगरपालिका–२ की १३ वर्षीया अञ्जु गौतमको बलात्कारपछि हत्या गरिएको घटनाप्रति तीव्र भत्र्सना गरेको छ । संघठनका अध्यक्ष विरेन्द्र शाहले आइतबार जारी गरेको प्रेस वक्तव्यमा अञ्जु गौतमको हत्या क्रूर, अमानवीय र दर्दनाक भएको उल्लेख गर्दै अपराधीहरूलाई तत्काल पक्राउ गरी कडा सजायको माग गरिएको छ। वक्तव्यमा भनिएको छ, “अञ्जु गौतमको शव १८ दिनपछि घरबाट खेल्न निस्किएकी अवस्थामा बिसंर र निर्मम तरिकाले फालिएको अवस्थामा फेला परेको घटनाले सम्पूर्ण समाजलाई हल्लाएको छ ।”
वक्तव्यमा यो घटना केवल एउटा परिवारको पीडा मात्र नभई सम्पूर्ण समाजकै कलङ्क भएको उल्लेख गरिएको छ । “महिला र साना बालबालिकामाथि हुने निरन्तर हिंसाका घटनाले हाम्रो समाजलाई भयावह दिशातर्फ डोर्याइरहेको छ,” वक्तव्यमा भनिएको छ । अखिल (क्रान्तिकारी) ले घटनामा संलग्न अपराधीहरूलाई छिटोभन्दा छिटो पक्राउ गरी कानूनी कठघरामा उभ्याउन सरकारसँग माग गरेको छ । साथै, यस्तो प्रकारका अमानवीय घटनाका विरुद्ध समाजका सबै तह र तप्काले ऐक्यबद्धता जनाउँदै महिला हिंसामुक्त समाज निर्माणतर्फ अघि बढ्नुपर्ने पनि उल्लेख गरिएको छ । संघठनले मृतक अञ्जु गौतमप्रति श्रद्धाञ्जलि अर्पण गर्दै शोकाकुल परिवारप्रति समवेदना प्रकट गरेको छ । वक्तव्यमा भनिएको छ, “निरन्तर दोहोरिँदै आएका महिला हिंसाका घटनाहरूको अन्त्यका लागि हाम्रो समाजलाई एकजुट हुनुपर्छ। महिला हिंसामुक्त समाज निर्माणको दिशामा सबैले दृढ संकल्प लिनु जरुरी छ ।”