सुनसरी, कात्तिक ९ गते । नेपाल कम्युनिस्ट पार्टी (बहुमत) सुनसरी जिल्लाले ध्रुवीकरण कार्यक्रम सम्पन्न गरेको छ । कार्यक्रममा क्रान्तिकारी कम्युनिस्ट पार्टी नेपालका सुनसरी जिल्ला सदस्य तथा क्रान्तिकारी मजदुर संगठनका जिल्ला अध्यक्ष गोपी भण्डारी र नेकपा (एमाले) का तुलसी रावत पार्टी (बहुमत) मा प्रवेश गर्नुभएको हो । कार्यक्रम नेकपा (बहुमत) सुनसरी जिल्ला कमिटीको आयोजनामा सम्पन्न भएको हो । कार्यक्रममा पार्टीका पोलिटब्युरो सदस्य तथा १ नम्बर ब्युरो इन्चार्ज धमिल, पोलिटब्युरो सदस्य नरेश र संखुवासभा सेक्रेटरी भानु लगायतका नेताहरूको उपस्थित थियो ।
ध्रुवीकरणमा सहभागी भएका भण्डारी र रावतलाई प्रमुख अतिथि धमिलसहित अन्य अतिथिहरूले अबिर लगाएर पार्टीमा स्वागत गरेका थिए । कार्यक्रमको सञ्चालन सिर्जनले गर्नुभएको थियो भने अध्यक्षता नेकपा (बहुमत) सुनसरी जिल्ला सेक्रेटरी तथा पार्टी केन्द्रीय समिति सदस्य (सिसीएम) जटिलले गर्नुभएको थियो । कार्यक्रमलाई सम्बोधन गर्दै प्रमुख अतिथि धमिलले वैज्ञानिक समाजवाद नै आजको देशको संकट समाधानको एकमात्र बाटो भएको बताउँदै सबै क्रान्तिकारी, देशभक्त र कम्युनिष्ट शक्तिहरू एउटै मोर्चामा एकजुट हुनुपर्नेमा जोड दिनुभयो । त्यस्तै, पोलिटब्युरो सदस्य नरेशले नेकपा (बहुमत) नै नेपालको क्रान्तिकारी धारको नेतृत्व गर्ने सक्षम शक्ति भएको बताउँदै आगामी समाजवादी क्रान्तिको जिम्मेवारी यही पार्टीले निर्वाह गर्ने विश्वास व्यक्त गर्नुभयो ।