बेइजिङ, कात्तिक १० गते । चीनले अमेरिकी नीतिलाई विश्व बजार अस्थिर बनाएको भन्दै ‘बहुध्रुवीय संसारको आगमन’ लाई स्वागत गरेको छ । अमेरिकी राष्ट्रपति डोनाल्ड ट्रम्प र चिनियाँ राष्ट्रपति सी जिनपिङबीच आसन्न उच्चस्तरीय वार्तापूर्व चीनका विदेशमन्त्री वाङ यीले सोमबार बेइजिङमा आयोजित फोरममा यस्तो धारणा व्यक्त गर्नुभएको हो । विदेशमन्त्री वाङले अमेरिकी प्रशासनमाथि विश्व अर्थतन्त्रलाई राजनीतिक प्रभावमा पार्ने, व्यापारिक प्रतिस्पर्धालाई गुटबन्दीमा रुपान्तरण गर्ने र प्रतिबद्धताबाट पछि हट्ने प्रवृत्तिको आरोप लगाउनुभयो । उहाँले भन्नुभयो, “आर्थिक र व्यापारिक विषयलाई राजनीतिकरण गर्नु, विश्व बजारलाई कृत्रिमरूपमा विभाजन गर्नु र व्यापार युद्ध तथा कर युद्धको सहारा लिनु विश्व अर्थतन्त्रका लागि घातक छ । तर इतिहासको प्रवाह उल्ट्याउन सकिँदैन — बहुध्रुवीय संसार अब निश्चित रूपमा आउँदैछ ।”
यो भनाइ अमेरिकी राष्ट्रपति ट्रम्पले आइतबार एसियाली भ्रमण सुरु गर्नुभएका बेला आएको हो । ट्रम्पको भ्रमण दक्षिण कोरियामा राष्ट्रपति सी जिनपिङसँग हुने प्रत्यक्ष वार्तासँग समाप्त हुनेछ । जनवरीमा ट्रम्पले दोस्रो कार्यकाल सुरु गरेपछि दुई नेताबीचको यो पहिलो आमनेसामने भेट हुनेछ । यसअघि अमेरिकी अर्थमन्त्री स्कट बेसेन्ट र चिनियाँ उपप्रधानमन्त्री हे लिफेङबीच दुई दिन लामो व्यापार वार्ता सम्पन्न भएको थियो । उक्त वार्तामा नोभेम्बर १ देखि लागु हुन लागेको १०० प्रतिशत अतिरिक्त कर टार्नेबारे छलफल भएको थियो । चीनका उप–वाणिज्य मन्त्री ली चेङ्गाङले वार्ताबाट प्रारम्भिक सहमति भएको जानकारी दिनुभयो । उता, अमेरिकी अर्थमन्त्री बेसेन्टले एबिसी समाचारसँग कुरा गर्दै अतिरिक्त शुल्क अस्थायी रूपमा स्थगित गरिएको र दुर्लभ पृथ्वी खनिज तथा अमेरिकी सोयाबिन निर्यातका विषयमा सहमति नजिकिएको बताएका छन् ।