१७ कात्तिक, काठमाडौं। भारतीय महिला क्रिकेट टोलीले ऐतिहासिक सफलता हात पारेको छ । मुम्बईमा आइतबार सम्पन्न महिला एकदिवसीय विश्वकप क्रिकेटको फाइनलमा भारतले दक्षिण अफ्रिकालाई ५२ रनले पराजित गर्दै पहिलोपटक विश्वकपको उपाधि जितेको हो । टस हारेर पहिले ब्याटिङको निम्तो पाएको भारतले ५० ओभरमा ७ विकेटको क्षतिमा २९८ रनको प्रतिस्पर्धात्मक स्कोर बनायो । ओपनर शफाली वर्माले सर्वाधिक ८७ रन जोडिन् भने दीप्ति शर्माले ५८ रन र स्मृति मन्धानाले ४५ रनको योगदान दिइन् । जवाफमा २९९ रनको लक्ष्य पछ्याउने क्रममा दक्षिण अफ्रिका ४५.३ ओभरमा २४५ रनमै अलआउट भयो । कप्तान लाउरा वुल्भार्डले ९८ बलमा शानदार १०१ रन बनाए पनि टोलीलाई जित दिलाउन सकिनन् । एनरी डर्कसनले ३५ रन जोडिन् ।

भारतका लागि दीप्ति शर्मा बलिङमा पनि नायक सावित भइन । उनले ५ विकेट लिँदै उत्कृष्ट प्रदर्शन गरिन् । शिफाली वर्माले २ विकेट र श्री चरनीले १ विकेट लिइन् । दक्षिण अफ्रिकाको तर्फबाट आयाबोङ्गा खाकाले ३ विकेट लिइन् भने नोकुलेलो मलाबा, नदीन डे क्लर्क र क्लोए टायरनले १–१ विकेट लिए । यसअघि भारतले दुई पटक फाइनल पुगे पनि उपाधि जित्न सकेको थिएन । यसपटक भने सेमिफाइनलमा अस्ट्रेलियालाई पराजित गर्दै अन्ततः विश्वकप जित्न सफल भयो । महिला क्रिकेट विश्वकपको इतिहासमा अस्ट्रेलियाले सबैभन्दा धेरै — ७ पटक — उपाधि जितेको छ ।