सुर्खेत, कात्तिक १७ । सुर्खेत स्थित बिरेन्द्रनगरको सूर्यदिप बोर्डिङ स्कूलले शुल्क तिर्न नसकेको कारण कक्षा ४ र ६ मा अध्ययनरत दुई जना बालबालिकालाई विद्यालयबाट निष्कासन गरेको घटनाप्रति नेकपा(बहुमत) निकट अखिल नेपाल राष्ट्रिय स्वतन्त्र विद्यार्थी यूनियन (क्रान्तिकारी), जिल्ला समिति सुर्खेतले तीव्र आपत्ति जनाएको छ । संगठनका सुर्खेत इञ्चार्ज अम्मर रसाइलीले आइतबार एक प्रेस वक्तव्य जारी गर्दै यस्तो कदम शिक्षा अधिकारको खुला उल्लंघन भएको बताएको छ । वक्तव्यमा भनिएको छ, “शिक्षा कुनै पनि व्यापारीक वस्तु होइन। आर्थिक कठिनाइका कारण विद्यार्थीलाई विद्यालयबाट निकाल्नु नेपालको संविधान र बालअधिकारको मर्म विपरीतको कार्य हो ।”
वक्तव्यमा भनिएको छ, “निजी विद्यालयहरूले शिक्षालाई व्यापारको रूपमा परिवर्तन गर्ने प्रवृत्तिले समाजमा शिक्षा माफियाको कुरूप रूप देखाएको छ, जसप्रति हामी गम्भीर निन्दा र घोर विरोध गर्दछौं ।” अखिल (क्रान्तिकारी)ले विद्यालय प्रशासनलाई तुरुन्तै ती विद्यार्थीहरूलाई पुनः अध्यनमा फर्काउने वातावरण बनाउन चेतावनी दिएको छ । त्यसो नगरे कडा आन्दोलनमा जान बाध्य हुने समेत जनाएको छ । वक्तव्यमा भनिएको छ, “यदि विद्यालय प्रशासनले तिनै विद्यार्थीलाई फिर्ता नगरी आफ्नो गल्ती सुधार गरेन भने, अखिल (क्रान्तिकारी) शैक्षिक माफियाविरुद्ध निर्णायक संघर्षमा उत्रिनेछ ।”