१८ कात्तिक, काठमाडौं । सर्वोच्च अदालत र काठमाडौं जिल्ला अदालतले जेनजी आन्दोलनका क्रममा भएका तोडफोड र आगजनी घटनाको अनुसन्धान माग गर्दै प्रहरीमा जाहेरी दर्ता गराएका छन् । दुवै अदालतका तर्फबाट जाहेरी काठमाडौं प्रहरी परिसर भद्रकालीमा दर्ता गरिएको हो । परिसरका प्रमुख एसएसपी रमेश थापाले जाहेरी आएको पुष्टि गर्दै अनुसन्धान प्रक्रिया औपचारिक रूपमा सुरु भइसकेको जानकारी दिएका छन् । “अदालतका तर्फबाट जाहेरी आएको छ । अब अनुसन्धान अघि बढ्छ,” एसएसपी थापाले भने ।
प्रहरीका अनुसार अदालत परिसरमा तोडफोड र आगजनीमा संलग्न व्यक्तिहरूको पहिचान र पक्राउका लागि खोजी कार्य तीव्र पारिएको छ । गत २३ र २४ भदौमा भएको जेनजी आन्दोलनका क्रममा सर्वोच्च अदालत परिसरमा ठूलो क्षति पुगेको थियो । आन्दोलनकारीहरूले गरेको आगजनीका कारण अदालतका महत्त्वपूर्ण कागजातहरू जलेर नष्ट भएका थिए । न्यायालयमा भएको यस्तो तोडफोड र क्षतिलाई देशको न्याय प्रणालीमाथिको गम्भीर आक्रमणको रूपमा लिइएको छ । अहिले प्रहरी र सम्बन्धित निकायहरूले घटना सम्बन्धी प्रमाण संकलन र प्रत्यक्ष संलग्न व्यक्तिहरूको खोजीमा काम अघि बढाइरहेका छन् ।