काठमाडौँ — दरबारमार्गस्थित नेपाल ट्रस्टको जग्गा लिजमा दिएको विषयमा प्रहरीले ठगी र आपराधिक विश्वासघातसम्बन्धी आरोपमा अनुसन्धान थालेको छ । सोही प्रकरणमा नेपाल ट्रस्टका तत्कालीन सहसचिव लेखबहादुर कार्की (६६ वर्ष) लाई प्रहरीले पक्राउ गरेको छ । केन्द्रीय अनुसन्धान ब्युरो (सीआईबी) का प्रमुख प्रहरी अतिरिक्त महानिरीक्षक मनोज केसी का अनुसार कार्कीलाई शुक्रबार पक्राउ गरी थप अनुसन्धान थालिएको हो । प्रहरीका अनुसार प्रारम्भिक जाँचमा ३० वर्षका लागि गरिएको लिज सम्झौतामा कम्पनीलाई नोक्सानी हुने गरी सम्झौता गरिएको र आवश्यक प्रक्रिया नअपनाई थप जग्गा समेत समावेश गरिएको पाइएको छ ।
सम्झौतामा कित्ता नं. ४६०६ को जग्गा लिजमा दिने उल्लेख भए पनि, कित्ता नं. ४६०५ समेत मिलाएर सम्झौता गरिएको प्रहरीको दाबी छ । सो कार्य नेपाल ट्रस्टको सञ्चालन समितिको निर्णय र कानुनी आधारबिना भएको प्रारम्भिक तथ्यले देखाएको सीआईबीले जनाएको छ । अवकाशप्राप्त सहसचिव कार्कीको बयानका आधारमा प्रहरीले थप अनुसन्धान अघि बढाउने तयारी गरेको छ । यस प्रकरणले नेपाल ट्रस्टका सम्पत्तिहरूको व्यवस्थापन र सरकारी जग्गा लिज प्रक्रियाको पारदर्शिता सम्बन्धी प्रश्न उठाएको छ ।