काठमाडौं । विभिन्न माग राख्दै मेलम्ची खोलाको पानी काठमाडौं ल्याउने कार्य अवरुद्ध गरिरहेका स्थानीयवासीले आन्दोलनका कार्यक्रम फिर्ता लिएका छन् । मंगलबार राति सरकार र स्थानीय प्रतिनिधिबीच १५ बुँदे सहमति भएपछि मेलम्ची खानेपानी आयोजनाको पानी पथान्तरणमा आएको अवरोध अन्त्य भएको हो । ऊर्जा, जलस्रोत तथा सिंचाइ, भौतिक पूर्वाधार तथा यातायात तथा शहरी विकासमन्त्री कुलमान घिसिङको उपस्थितिमा भएको वार्ताले विवाद समाधान गरेको हो । मन्त्रालयका सचिवहरू, खानेपानी मन्त्रालयकी सचिव प्रमिला देवी शाक्य बज्राचार्य, मेलम्ची खानेपानी विकास समितिका पदाधिकारी तथा स्थानीय प्रतिनिधिहरूको उपस्थितिमा सम्झौता पत्रमा हस्ताक्षर गरिएको थियो ।
पाँच दिनदेखि स्थानीयले आयोजना क्षेत्रबाट पानी पठाउन रोकेपछि सिंहदरबारमा निरन्तर वार्ता हुँदै आएको थियो । मंगलबार राति १० बजेसम्म चलेको छलफलमा सरकार र मेलम्ची बाढी पीडित संघर्ष समितिका प्रतिनिधिबीच सहमति जुटेपछि आन्दोलन फिर्ता लिइएको हो । खानेपानी मन्त्रालयका अनुसार सहमति कार्यान्वयनसँगै मेलम्चीको पानी पुनः काठमाडौं पठाउने प्रक्रिया सुरु हुनेछ । मन्त्रालयले अवरोध हटेसँगै काठमाडौं उपत्यकामा मेलम्चीको पानी आपूर्ति सहज हुने जनाएको छ ।