काठमाडौँ । नेपाल क्रिकेट संघ (क्यान)ले दोस्रो संस्करणको नेपाल प्रिमियर लिग (एनपिएल) आगामी मंशीर १ गतेदेखि त्रिवि क्रिकेट रंगशाला किर्तिपुरमा आयोजना हुने घोषणा गरेको छ । यस पटकका खेलहरू पहिलोपटक फ्लडलाइटमा (राति) खेलाइने भएका छन् । क्यानले सोमबार राति लिगको खेल तालिका सार्वजनिक गर्दै लिगका केही खेलहरू दिउँसो र केही खेलहरू साँझ फ्लडलाइटमा सञ्चालन गरिने जानकारी दिएको हो । तालिकाअनुसार उद्घाटन खेल साविक विजेता जनकपुर बोल्ट्स र काठमाडौँ गुर्खाजबिच मंशीर १ गते अपरान्ह ४ः०० बजे हुनेछ । साथै, केही खेलहरू बिहान ११ः०० बजेबाट सुरु हुने बताइएको छ । यस संस्करणमा कुल १९ वटा लिग खेल, ३ वटा प्लेअफ र १ फाइनल खेल गरी २३ वटा खेल सबै फ्लडलाइटमा हुने छन् ।
त्रिवि क्रिकेट रंगशालामा हालसालै गरिएको मर्मतपछि १३ हजार दर्शक क्षमताको प्यारापिट तयार गरिएको छ । साथै, रंगशालामा फ्लडलाइट जडानको काम अन्तिम चरणमा पुगेको क्यानले जनाएको छ । एनपिएलमा यसपटक ८ फ्रेन्चाइज टोली सहभागी हुनेछन् । एनपिएल मङ्सिर १ देखि २७ गतेसम्म सञ्चालन हुनेछ । क्यानका एक पदाधिकारीका अनुसार, “फ्लडलाइटमा खेल आयोजना गर्नु नेपाली क्रिकेटका लागि नयाँ युगको सुरुवात हो । यसले दर्शक, प्रायोजक र खेलाडी सबैमा नयाँ उर्जा भर्नेछ ।” नेपाल प्रिमियर लिगको दोस्रो संस्करण नेपाली क्रिकेट इतिहासकै सबैभन्दा ठुलो र आधुनिक प्रतियोगिता बन्ने संकेत देखिएकोले मंशीरदेखि कीर्तिपुर फेरि क्रिकेटमय बन्ने निश्चित छ ।