काठमाडौँ — नेपाल प्रिमियर लिग (एनपीएल) का खेलमा अनलाइन सट्टाबाजी सञ्चालन गरेको आरोपमा आठ भारतीय नागरिकलाई प्रहरीले पक्राउ गरेको छ । उपत्यका अपराध अनुसन्धान कार्यालयका अनुसार पक्राउ परेकामध्ये सबै जना भारतको आन्ध्र प्रदेशका स्थायी बासिन्दा भएका र काठमाडौंको सामाखुशी तथा आसपासका क्षेत्रमा बस्दै आएका थिए । पक्राउ परेकामा ३१ वर्षीय राजा यदुला, ३५ वर्षीय महेश बाबु, ३० वर्षीय पण्डित श्रीनिवासुलु, २० वर्षीय सेख सोयब, ३० वर्षीय नभिन मड्डेला, ३२ वर्षीय महमद रफी सेख, १९ वर्षीय साइकुमार तम्मिसेट्टी र २८ वर्षीय सेखचन्द बसल रहेका उपत्यका अपराध अनुसन्धान कार्यालयका सूचना अधिकारी प्रहरी उपरीक्षक काजीकुमार आचार्यले जानकारी दिए ।
प्रहरीका अनुसार उनीहरूले बेटाकुलर लाइभ नामक अनलाइन प्लेटफर्ममार्फत एनपीएलका खेलको हार–जित निर्धारण गरी रकम लगानी गर्ने सट्टाबाजी गतिविधि सञ्चालन गर्दै आएका थिए । विशेष सूचनाका आधारमा प्रहरीले उनीहरूलाई बल्खु क्षेत्रबाट नियन्त्रणमा लिएको हो । पक्राउ परेकासँगबाट १५ थान मोबाइल फोन बरामद गरिएको छ । ती उपकरणको प्राविधिक विश्लेषणपछि सट्टाबाजीसँग सम्बन्धित थप प्रमाण संकलन भइरहेको प्रहरीले जनाएको छ । सट्टाबाजी वा जुवाताससँग सम्बन्धित गतिविधि मुलुकी अपराध संहिता २०७४ को दफा १२५(४) अनुसार दण्डनीय हुने भएकाले उनीहरूलाई आवश्यक अनुसन्धान तथा कानूनी कारबाहीका लागि जिल्ला प्रहरी परिसर पठाइएको सूचना अधिकारी आचार्यले बताए ।