काठमाडौं । पत्रकार दिपेन्द्र शर्माद्वारा लिखित पुस्तक ‘युद्ध पत्रकारिता’ शुक्रबार राजधानीको संवाद डबलीमा सार्वजनिक गरिएको छ । पुस्तक लोकार्पण गर्दै राष्ट्रिय सभा अध्यक्ष नारायण प्रसाद दाहालले युद्धकालीन पत्रकारितालाई “बारुद र मसीको घोल” भनेर परिभाषित गरे । कार्यक्रममा बोल्दै अध्यक्ष दाहालले जनयुद्धका दौरान जनपत्रकारहरूले खेलेको भूमिकालाई साहसिक र अतुलनीय बताए । आफू पनि जनयुद्धका क्रममा पत्रकारितामा संलग्न रहेको स्मरण गर्दै उनले भने, “बन्दुक र कलमको समायोजन, लडाइँ र पढाइको फ्युजन, बारुद र मसिको घोलको मिश्रण नै आजको गणतन्त्र हो ।” दाहालका अनुसार जनयुद्धमा सहभागी पत्रकारहरू मात्र होइन, मुलधारका सञ्चारकर्मीहरूको योगदानका कारण पनि आजको परिवर्तन सम्भव भएको हो ।
नेपाल पत्रकार महासंघकी अध्यक्ष निर्मला शर्माले जनयुद्धका बेला गरिएको पत्रकारितालाई मिसन पत्रकारिताका रूपमा व्याख्या गरिन् । उनले त्यतिबेला राज्यद्वारा सञ्चारमाथि दमन भएको उल्लेख गर्दै अहिले पनि चौतर्फी आक्रमण भइरहेको दाबी गरिन् । “नागरिकलाई सहज रूपमा सूचना पाउने अधिकार सुनिश्चित गर्न राज्य र सरोकारवाला पक्ष गम्भीर बन्नुपर्छ,” उनले भनिन् । पत्रकार र अनुसन्धानकर्ता महेश्वर दाहालले नेपाली पत्रकारितामा युद्ध पत्रकारिताको अभ्यास माओवादी जनयुद्धका क्रममा व्यापक रूपमा विस्तार भएको बताए । साथै, यस्तो पत्रकारितालाई संस्थागत रूपमा दस्तावेजीकरण गर्नुपर्नेमा जोड दिए । पुस्तकका लेखक दिपेन्द्र शर्माले जनयुद्धमा धेरै पत्रकारहरू संलग्न भएर युद्ध पत्रकारिता गरेको उल्लेख गर्दै त्यस समयको अनुभव र योगदानलाई दस्तावेजीकरण गर्ने उद्देश्यले पुस्तक तयार गरिएको बताए ।