काठमाडौं । आगामी फागुन २१ गते हुने प्रतिनिधि सभा सदस्य निर्वाचनलाई शान्तिपूर्ण, निष्पक्ष र भयरहित ढङ्गले सम्पन्न गराउन सुरक्षा तयारी सुदृढ गर्न प्रधानमन्त्री सुशीला कार्कीले नेपाली सेनालाई आवश्यक निर्देशन दिनुभएको छ । प्रधानमन्त्री कार्कीले आज जङ्गी अड्डास्थित नेपाली सेनाको मुख्यालयको निरीक्षण भ्रमण गर्दै सेनाले तयार पारेको चुनाव सुरक्षा योजना, वर्तमान सुरक्षा अवस्था, चुनौती तथा आगामी योजनाबारे प्रत्यक्ष जानकारी लिन्ुभएको हो । सेनाले चुनावको संवेदनशीलताका आधारमा सैनिक तैनाथी, समन्वय संरचना र सम्भावित जोखिम व्यवस्थापनसम्बन्धी विस्तृत प्रस्तुतीकरण गरेको थियो ।
निरीक्षणका क्रममा प्रधानमन्त्री कार्कीले आन्दोलनपश्चात् गठन भएको सरकारले शान्ति–सुरक्षा कायम राख्दै तोकिएको मितिमा निर्वाचन सम्पन्न गर्नु राष्ट्रिय दायित्व रहेको उल्लेख गर्दै सेनाले पाएको जिम्मेवारी पूर्ण व्यावसायिकताका साथ निर्वाह गर्ने विश्वास व्यक्त गर्नुभयो । प्रधानमन्त्री कार्कीले जनताको सुरक्षाको प्रत्याभूति दिने र प्रहरीका कारबाहीलाई सुरक्षित र प्रभावकारी बनाउने वातावरण स्पष्ट कार्ययोजनासहित निर्माण गर्न, ‘एक थोपा रगत नबग्ने, एक जना पनि घाइते नपर्ने’ लक्ष्य राख्दै सुरक्षा निकायबीच अधिकतम समन्वयका साथ संवेदनशीलता–मुखी ढङ्गले काम गर्न, जेनजी आन्दोलनका क्रममा हराइएका वा लुटिएका हातहतियारको खोजी तथा नियन्त्रणमा सक्रिय रहन र फरार अभियुक्त पक्राउमा कुनै कमी–कसुर नराख्न समेत निर्देशन दिनुभयो ।