वीरगञ्ज — चालु आर्थिक वर्षको पहिलो चार महिनामा वीरगञ्ज नाका हुँदै ५४ अर्ब १२ करोड रुपैयाँ बराबरको पेट्रोलियम पदार्थ आयात भएको छ । डिजेल, पेट्रोल, एलपिजी, एटिएफ र मट्टितेल आयातमार्फत मात्रै २२ अर्ब ९० करोड रुपैयाँ राजस्व सङ्कलन भएको वीरगञ्ज भन्सार कार्यालयले जनाएको छ । गत आर्थिक वर्षको सोही अवधिमा ५१ अर्ब १९ करोड रुपैयाँको पेट्रोलियम पदार्थ आयात हुँदा २० अर्ब ८९ करोड राजस्व उठेको थियो । तुलनात्मक रूपमा यो वर्ष आयात रकममा २ अर्ब ९३ करोड तथा राजस्वमा करिब ९.६ प्रतिशत वृद्धि भएको भन्सार प्रशासक विष्णुप्रसाद ज्ञवालीले बताए ।
चालु आर्थिक वर्षको कात्तिक मसान्तसम्म २४ अर्ब ४० करोड मूल्य बराबरको दुई लाख ६८ हजार ६७६ किलोलिटर डिजेल आयात भएको छ । यसबाट १० अर्ब ७३ करोड रुपैयाँ राजस्व सङ्कलन गरिएको छ । गत वर्षको सोही अवधिमा २१ अर्ब ८३ करोड मूल्य बराबरको डिजेल आयात हुँदै ९ अर्ब ७८ करोड राजस्व उठेको थियो । चार महिनामा १४ अर्ब २७ करोड मूल्य बराबरको एक लाख ६६ हजार ६६३ किलोलिटर पेट्रोल आयात भएको छ । यसबाट ९ अर्ब ४३ करोड राजस्व सङ्कलन भएको छ । गत वर्षको सोही अवधिमा १२ अर्ब ४३ करोड मूल्य बराबरको पेट्रोल आयात हुँदा ८ अर्ब ११ करोड राजस्व लागेको थियो ।
एलपी ग्यास आयातमा भने केही कमी देखिएको छ । चालु आवमा ९ अर्ब ७७ करोड मूल्य बराबरको ९ करोड ७३ लाख ९६ हजार ४७२ किलोग्राम एलपी ग्यास आयात भएको छ । यसबाट १ अर्ब ८३ करोड राजस्व उठेको छ । गत आर्थिक वर्षको सोही अवधिमा ११ अर्ब १० करोड मूल्य पर्ने १० करोड ३ लाख ५९ हजार किलोग्राम एलपी ग्यास आयात हुँदा २ अर्ब ८ करोड राजस्व सङ्कलन भएको थियो ।