काठमाडौँ — प्रहरीको केन्द्रीय अनुसन्धान ब्युरो (सिआइबी)ले प्रभु बैंकका प्रमुख कार्यकारी अधिकृत (सिइओ) अशोक शेरचनलाई पक्राउ गरेको छ । आइतबार अनामनगरस्थित बैंकको कार्यालयबाटै उनलाई पक्राउ गरिएको सिआइबीले पुष्टि गरेको छ । सिआइबीका अनुसार प्रभु ग्रुपसँग जोडिएको ठगी प्रकरणमा केही रकम प्रभु बैंकमार्फत गएको देखिएको प्रारम्भिक अनुसन्धानपछि शेरचनलाई नियन्त्रणमा लिइएको हो । थप अनुसन्धानका लागि उनलाई सिआइबीको हिरासतमा राखिएको बताइएको छ ।
यसअघि नै बैंकका नायब प्रमुख कार्यकारी अधिकृत मणिराम पोखरेल र प्रमुख कर्जा अधिकृत रिवास श्रेष्ठलाई समेत सिआइबीले पक्राउ गरिसकेको छ । पक्राउ परेका सबैलाई ठगी सम्बन्धी मुद्दामा अनुसन्धान अघि बढाइएको छ । उक्त घटनामा संलग्नताको आरोपमा पहिले पक्राउ परेका बैंकका पूर्वअध्यक्ष तथा एमालेका पूर्वसांसद देवीप्रकाश भट्टचन भने हाजिरी जमानीमा छुटिसकेका छन् । सिआइबीले यस प्रकरणको विस्तृत अनुसन्धान जारी रहेको जनाएको छ ।