नेपाल कम्युनिस्ट पार्टी (बहुमत) ४ नम्बर ब्युरोद्वारा आयोजित राजनीतिक तथा वैचारिक प्रशिक्षण कार्यक्रम सफलतापूर्वक सम्पन्न भएको छ । कार्यक्रममा पार्टीका सचिवालय सदस्य गुणराज लोहनी प्रमुख अतिथिका रूपमा सहभागी भएका थिए । ब्युरो इन्चार्ज दिपेन्द्र चलाउनेको अध्यक्षतामा सम्पन्न प्रशिक्षण कार्यक्रम सुजन आयामले सञ्चालन गरेका थिए । प्रमुख अतिथि लोहनीले आफ्नो सम्बोधनमा नेपालको सार्वभौमसत्ता र स्वाधीनतामाथि देखिएको सम्भावित चुनौतीको सामना गर्न पार्टी पूर्णरूपमा तयार रहेको बताए । उनले पार्टीले ‘जनसंविधान’का लागि जनसंघर्ष अभियान अघि बढाइरहेको जानकारी पनि दिए ।
त्यसैगरी, कार्यक्रमका अध्यक्ष तथा सचिवालय सदस्य चलाउनेले देशमा रहँदै आएको राजनीतिक अस्थिरताले राष्ट्रलाई परनिर्भर बनाइरहेको जिकिर गर्दै यो अवस्थाबाट बाहिरिन स्वाधीन संयुक्त सरकार आवश्यक रहेको धारणा राखे । प्रशिक्षणमा सहभागीहरूले पार्टीको वैचारिक दिशानिर्देश, वर्तमान राजनीतिक अवस्थाको मूल्यांकन, आगामी संघर्षका कार्यक्रम तथा जनसंविधानका लागि जनसंघर्षसम्बन्धी विस्तृत प्रशिक्षण प्राप्त गरेका थिए ।