काठमाडौँ — पूर्वी युक्रेनको डोन्बास क्षेत्रमा जारी तनाव झन् चर्किंदै गएको छ । युक्रेनलाई उक्त क्षेत्रबाट सेना फिर्ता गर्न रुसले कडा चेतावनी दिएको छ। राष्ट्रपति भ्लादिमिर पुटिनले इन्डिया टुडेसँगको अन्तर्वार्तामा डोन्बासका क्षेत्रमा युक्रेनी सेना नभए मात्रै स्थिरता कायम हुनसक्ने दाबी गर्दै, “यी इलाकालाई युक्रेनले छाड्नुपर्छ, नभए हामी आफैं कब्जा गर्छौँ,” भने । युक्रेनका राष्ट्रपति भोलोदिमिर जेलेन्स्कीले भने आफ्नो सार्वभौमिक भूभागमा कुनै पनि प्रकारको सम्झौता अस्वीकार्य रहेको बताएका छन् । सन् २०२२ मा युद्ध सुरु भएयता रुसले डोन्बासको करिब ८५ प्रतिशत भूभाग कब्जामा लिइसकेको अन्तर्राष्ट्रिय विश्लेषणले बताइरहेको छ ।
युद्ध बन्द गर्न अमेरिकाको मध्यस्थतामा चलिरहेको शान्ति प्रक्रियामा पनि दुई देशबीच भूमिसम्बन्धी दाबीमा सहमति नजुटेपछि प्रगति हुन सकेको छैन । रुसद्वारा कब्जा गरिएका क्षेत्रहरूको भविष्य र युक्रेनलाई दिनुपर्ने सुरक्षा ग्यारेन्टीलाई वार्ताका प्रमुख मुद्दाका रूपमा हेरिएको छ । यसैबीच, गत मंगलबार मस्कोमा अमेरिकी राष्ट्रपति डोनाल्ड ट्रम्पका विशेष दूत स्टिभ विटकोफले पुटिनसँग भेटवार्ता गरेका थिए । त्यसपछि उनले फ्लोरिडामा युक्रेनी प्रतिनिधिमण्डलसँग भेट्ने तयारी गरिरहेका छन् । ट्रम्पले पुटिनसँगको भेटलाई “उत्कृष्ट” भनेका छन्, तर अमेरिकाले अघि सारिरहेको केही प्रस्तावप्रति आफू पूर्ण सहमत नभएको पुटिनको टिप्पणीले वार्ताको भविष्य अझै अनिश्चित देखिन्छ ।