सर्लाही । सर्लाहीमा बिरामी बोक्ने उद्देश्यमै सञ्चालन हुँदै आएको रेडक्रसको एम्बुलेन्स गाँजा ओसारपसारमा प्रयोग भएको छ भन्ने तथ्य खुलासा भएको छ । हरिवनबाट लागुऔषधसहित एम्बुलेन्स नियन्त्रणमा लिएपछि यो गतिविधि सार्वजनिक भएको हो । सर्लाहीको हरिवन नगरपालिका–५, घुर्कौलीस्थित हिरालाल टोलमा ज १ च १५५८ नम्बरको एम्बुलेन्सको पछाडिको भागमा बोराभित्र लुकाइराखिएको ५१ किलो ५ सय ग्राम गाँजा प्रहरीले बरामद गरेको छ । सो एम्बुलेन्स नेपाल रेडक्रस सोसाइटी, रामनगर बहुअर्वाको नाममा दर्ता भएको थियो ।
एम्बुलेन्स चालक रौतहटको यमुनामाई गाउँपालिका–४, सरुअठाका ३७ वर्षीय सुरेन्द्र राय यादवलाई प्रहरीले पक्राउ गरेको छ । पक्राउ परेका यादवसहित बरामद पदार्थबारे थप अनुसन्धान भइरहेको प्रहरी उपरीक्षक योगेन्द्रकुमार खड्काले जानकारी दिए । यसअघि पनि शुक्रबार प्रहरीले लालबन्दी नगरपालिका–११, हीरापुरबाट ५२ किलो गाँजा बरामद गर्दै एक पिकअप भ्यानसहित एक जनालाई नियन्त्रणमा लिएको थियो ।