कपिलवस्तु । नेपाल कम्युनिस्ट पार्टी (बहुमत) ५ नम्बर ब्यूरो अन्तर्गत कपिलवस्तु जिल्लाका विभिन्न स्थानीय तहमा गठित बैंक तथा वित्तीय मिटरब्याजविरुद्ध प्रतिरोध समितिको संयुक्त प्रशिक्षण तथा बैठक सम्पन्न भएको छ । जिल्लाको शिवराज नगरपालिका, विजय नगर गाउँपालिका, बहादुरगन्ज नगरपालिका र कृष्णानगर नगरपालिकामा प्रतिरोध समितिका प्रतिनिधि, अगुवा कार्यकर्ता तथा मिटरब्याज र लघुवित्तीय शोषणबाट पीडितहरूको सहभागितामा कार्यक्रम गरिएको हो । कार्यक्रममा बैंक तथा वित्तीय संस्थाको नाममा फैलिँदै गएको मिटरब्याज, लघुवित्तीय संस्थाको मनपरी ब्याजदर, जबर्जस्ती असुली, धम्की, कागजात दुरुपयोग र घरजग्गा कब्जाजस्ता घटनाबारे विस्तृतरूपमा छलफल गरिएको थियो । त्यस्तै प्रशिक्षण सत्रमा सहभागीहरूलाई मिटरब्याजको संरचना, कानुनी अवस्था, पीडितको अधिकार, प्रतिरोधका संगठनात्मक विधि तथा सामूहिक संघर्षको आवश्यकता बारे स्पष्ट पारिएको थियो । प्रशिक्षण तथा बैठकमा पार्टी सचिवालय सदस्य तथा ५ नम्बर ब्यूरो इन्चार्ज जितले वर्तमान वित्तीय प्रणाली श्रमिक, किसान र साना व्यवसायीविरुद्ध केन्द्रित रहेको आरोप लगाउँदै मिटरब्याज र लघुवित्तीय शोषण राज्यकै संरक्षणमा मौलाएको बताए । उनले पीडितहरूलाई संगठित गर्दै जनस्तरबाट दबाब सिर्जना नगरेसम्म समस्या समाधान नहुने उल्लेख गर्दै प्रतिरोध समितिलाई सक्रिय, अनुशासित र जनमुखी रूपमा अघि बढ्न निर्देशन दिए ।
त्यसैगरी पार्टी सचिवालय सदस्य तिलकले मिटरब्याज र लघुवित्तीय शोषण केवल आर्थिक समस्या नभई सामाजिक र राजनीतिक अन्यायको रूपमा देखिएको बताए । उनले गाउँ–टोलदेखि नगरपालिका स्तरसम्म पीडितहरूको एकताबद्ध आवाज निर्माण गर्नुपर्नेमा जोड दिँदै पार्टी पीडितको पक्षमा दृढतापूर्वक उभिने प्रतिबद्धता व्यक्त गरे । कार्यक्रममा पीडितहरूले एक सयको मासिक ५ रूपैँयाका दर ब्याज लिने गरेको र ५० हजार साँवा लिएकोमा एकलाखको तमसुक (कागज) गराउने गरेको बताएका छन् । एकपीडितले भनिन् एक सयको ५ रूपैँया ब्याज भन्दै ५० हजार लिएकोमा दुईलाख पँचास हजार रूपंँया दिन मिटरब्याजीले दिबाव दिने गरेको र प्रहरीमा उजुरी दिने धम्की समेत दिइरहेको बताईन ।
बैठकमा सहभागी मिटरब्याज तथा लघुवित्तीय पीडितहरूले आफ्नो पीडाबारे खुलस्त धारणा राख्दै पार्टीसमक्ष सामूहिक निवेदन प्रस्तुत गरेका थिए । निवेदनमा अत्यधिक ब्याजदर खारेज, गैरकानुनी ऋण सम्झौता र फर्जी कागजात रद्द, जबर्जस्ती असुली बन्द, घरजग्गा फिर्ता, पीडितमाथि लगाइएका झुट्टा मुद्दा फिर्ता तथा दोषी साहु–लघुवित्तीय संस्थामाथि कडा कारबाहीको माग गरिएको छ । कार्यक्रममा प्रतिरोध समितिको आगामी कार्ययोजना समेत तय गरिएको छ। जसअनुसार पीडितहरूको तथ्यांक संकलन र स्थानीय तहमा दबाबमूलक गतिविधि तथा सामूहिक संघर्षका कार्यक्रम सञ्चालन गर्ने निर्णय गरिएको छ। कार्यक्रमको अध्यक्षतामा बैंक लघुबित्तीय तथा मिटरब्याज बिरूद्वको प्रतिरोध समिति संयोजक सलिनको रहेको थियो ।