बाँके । ज्यूँदै शिशुलाई मृत घोषणा गरेको गम्भीर घटनालाई लिएर नेपाल कम्युनिस्ट पार्टी (बहुमत) बाँकेले भेरी अस्पताल प्रशासनविरुद्ध कडा आपत्ति जनाउँदै चेतावनी दिएको छ। पार्टीले अस्पताल गेट अगाडि विरोध कार्यक्रम आयोजना गरी चरम लापरवाहीको निन्दा गरेको हो । जिल्ला सेक्रेटरी तिलकले संचालन गरेको कार्यक्रमलाई सम्बोधन गर्दै नेकपा (बहुमत) बाँकेका इञ्चार्ज शक्तिले भेरी अस्पताल प्रशासनले गरीब जनताका छोराछोरीप्रति गम्भीर गैरजिम्मेवारी देखाएको आरोप लगाए । उनले उचित उपचार गर्नुको सट्टा ज्यूँदै शिशुलाई मृत घोषणा गर्नु अमानवीय र आपराधिक लापरवाही भएको बताए। यस्ता घटनाहरू समयमै सुधार नगरे पार्टीले जनताको जीवन रक्षाका लागि अस्पताल प्रशासनविरुद्ध गम्भीर कदम चाल्न बाध्य हुने चेतावनी पनि उनले दिए ।
घटनाअनुसार जाजरकोट छेडागाड नगरपालिका–९ की २० वर्षीया कमला अधिकारी सुत्केरी ब्यथा लागेपछि भेरी अस्पताल, नेपालगञ्जमा भर्ना भएकी थिइन्। उनले सामान्यरूपमा शिशु जन्माए पनि प्रसूति कक्षमा कार्यरत कर्मचारीले शिशुको मृत्यु भएको भन्दै कपडामा पोको पारेर पोलोथिनमा राखी अन्तिम संस्कारका लागि आफन्तको जिम्मा लगाएका थिए ।अस्पतालले मृत घोषणा गरेको शिशुलाई अन्तिम संस्कारका लागि नेपालगञ्जस्थित बुलबुलियातर्फ लैजाँदै गर्दा बीच बाटोमै शिशु चल्मलाएको परिवारले जनाएको छ । त्यसपछि तत्कालै शिशुलाई पुनः अस्पताल ल्याइएको थियो । घटनाबारे जानकारी दिँदै परिवारले भने, “ज्यूँदो बच्चालाई मृत घोषणा गर्दै अस्पतालले गाड्न पठायो । यो अस्पतालको चरम लापरवाही हो, दोषीमाथि कडा कारबाही हुनुपर्छ ।” घटनापछि भेरी अस्पतालको सेवा र जिम्मेवारीमाथि गम्भीर प्रश्न उठेको छ भने दोषी कर्मचारीमाथि छानबिन र कारबाहीको माग व्यापक रूपमा उठ्न थालेको छ ।