काभ्रे । नेपाल कम्युनिस्ट पार्टी (बहुमत) काभ्रे जिल्लाले बनेपाबाट जनसंविधानका लागि जनसंघर्ष अभियान औपचारिक रूपमा सुरु गरेको छ । अभियानको उद्घाटन कार्यक्रम पार्टीको ३ नम्बर ब्युरो इन्चार्ज आजादको प्रमुख आतिथ्यतामा सम्पन्न भएको हो । कार्यक्रममा भक्तपुर जिल्ला इन्चार्ज प्रतिमा र सिन्धुपाल्चोक जिल्ला इन्चार्ज किरणको विशेष उपस्थिति रहेको थियो । उद्घाटन समारोहलाई सम्बोधन गर्दै प्रमुख अतिथि आजादले वर्तमान संविधानले जनताको वास्तविक समस्या समाधान गर्न नसकेको दाबी गर्दै जनसंविधान नै आजको आवश्यक विकल्प भएको बताए ।
कार्यक्रमलाई सम्बोधन गर्दै भक्तपुर जिल्ला इन्चार्ज प्रतिमाले स्वाधीन सरकार बिना जनताको अधिकार सुनिश्चित हुन नसक्ने उल्लेख गरिन् । कार्यक्रमको सञ्चालन जिल्ला सेक्रेटरी विष्णु तिमल्सिनाले गरेका थिए । अभियान उद्घाटनसँगै दुई दर्जन युवाहरू नेपाल कम्युनिस्ट पार्टी (बहुमत) मा प्रवेश गरेका छन् । जिल्ला इन्चार्ज सुन्तलीका अनुसार दीपकको नेतृत्वमा पार्टी प्रवेश गरेका युवाहरूमध्ये नरेन्द्र तामाङको नेतृत्वमा १८ सदस्यीय जेन–जी कमिटी समेत गठन गरिएको छ । पार्टीले जनसंविधानका लागि जनस्तरबाट दबाब सिर्जना गर्ने उद्देश्यसहित अभियानलाई काभ्रेका विभिन्न स्थानमा निरन्तरता दिने जनाएको छ ।