काठमाडौं । नेकपा(बहुमत) निकट अखिल नेपाल राष्ट्रिय स्वतन्त्र विद्यार्थी युनियन (क्रान्तिकारी) ले प्राविधिक शिक्षा तथा व्यावसायिक तालिम परिषद् (CTEVT) अन्तर्गत नर्सिङ अध्ययन गर्न इच्छुक हजारौँ विद्यार्थी अध्ययनबाट बञ्चित हुनुपरेको भन्दै सरकारको गम्भीर ध्यानाकर्षण गराएको छ । संगठनले स्वास्थ्य तथा जनसंख्या मन्त्रालयलाई बुझाएको ध्यानाकर्षण पत्रमा आवश्यक पूर्वाधार, जनशक्ति र व्यवस्थापनको अभावका कारण योग्य विद्यार्थीहरू नर्सिङ अध्ययन गर्नबाट वञ्चित भइरहेको उल्लेख गरिएको छ । शिक्षा तथा स्वास्थ्यजस्ता संवेदनशील क्षेत्रमा राज्यको गैरजिम्मेवार भूमिका र निजीकरणमुखी नीतिका कारण समस्या झनै जटिल बन्दै गएको संघको ठहर छ । ध्यानाकर्षण पत्रमा प्राविधिक तथा स्वास्थ्य शिक्षामा गुणस्तर, पहुँच र समानता सुनिश्चित गर्न सरकार असफल भएको आरोप लगाइएको छ । आवश्यक निर्णय र समन्वयको अभावमा CTEVT अन्तर्गतका शिक्षण संस्थाहरूमा प्रयोगात्मक अभ्यास (Practical Training) समेत सुनिश्चित हुन नसकेको उल्लेख गरिएको छ ।
संघले प्रदेश तथा संघीय सरकार मातहत रहेका सरकारी अस्पतालहरूलाई नर्सिङ अध्ययनरत विद्यार्थीहरूको प्रयोगात्मक अभ्यासका लागि प्रयोग गर्न तत्काल निर्णय गर्न माग गरेको छ । यसो नगरेमा सार्वजनिक स्वास्थ्य शिक्षाको दायित्व कमजोर पार्दै निजी शिक्षण संस्थालाई फाइदा पुग्ने अवस्था सिर्जना हुने चेतावनी समेत दिइएको छ । समस्या समाधानका लागि राज्यले निजीकरण र व्यापारीकरणमुखी नीतिको अन्त्य गर्दै निःशुल्क, गुणस्तरीय र सर्वसुलभ प्राविधिक तथा स्वास्थ्य शिक्षाको व्यवस्था गर्नुपर्ने अखिल (क्रान्तिकारी) को माग छ । मागहरू तत्काल सम्बोधन नभए विद्यार्थी, अभिभावक तथा सरोकारवालासँग सहकार्य गर्दै संघर्षका कार्यक्रम घोषणा गर्न बाध्य हुने संघले जनाएको छ ।