२९ माघ, मुम्बई — आईसीसी टी–२० विश्वकप २०२६ अन्तर्गत समूह चरणको आफ्नो दोस्रो खेलमा नेपालले आज इटलीसँग प्रतिस्पर्धा गर्दैछ । समूह ‘सी’ अन्तर्गतको यो खेल दिउँसो सवा ३ बजेदेखि मुम्बईस्थित वाङ्खेडे स्टेडियममा हुनेछ । नेपाल र इटली दुवै टोली पहिलो खेलमा पराजित भएका थिए । नेपाल इंग्ल्यान्डसँग पराजित भएको थियो भने इटली स्कटल्यान्डसँग हार बेहोरेको थियो । त्यसैले आजको खेल दुवै टोलीका लागि पहिलो जित दर्ता गर्ने महत्वपूर्ण अवसरका रूपमा हेरिएको छ । नेपाल र इटली १३ वर्षपछि फरक फर्म्याटमा आमनेसामने हुन लागेका हुन् । सन् २०१३ मा आईसीसी डिभिजन ३ अन्तर्गत ५० ओभरको खेलमा यी दुई टोली भिडेका थिए । तर बिहीबार हुने खेल उनीहरूबीचको पहिलो टी–२० अन्तर्राष्ट्रिय (टी–२०आई) भेट हुनेछ ।
नेपालले सन् २०१४ मा अफगानिस्तानविरुद्धको खेल जितेपछि विश्वकपमा जित निकाल्न सकेको छैन । त्यसैले इटलीविरुद्धको खेल १२ वर्षपछि विश्वकपमा पुनः जितको खोजी गर्ने अवसरका रूपमा समेत रहेको छ । समूह ‘सी’ को अंक तालिकामा वेस्ट इन्डिजले खेलेका दुवै खेल जित्दै ४ अंक जोडिसकेको छ । इंग्ल्यान्ड र स्कटल्यान्डले दुई खेलबाट समान २–२ अंक जोड्दा नेपाल र इटली अंकविहीन छन् । आजको खेलले समूहको समीकरणमा महत्वपूर्ण प्रभाव पार्ने अपेक्षा गरिएको छ ।