काठमाडौं । नेपाल कम्युनिस्ट पार्टी (बहुमत) ले फागुन ५ गते नेपाल बन्द चुनाव खारेजीका लागि आह्वान गरेको बताएको छ । पार्टीले संसदीय चुनाव स्थगित गर्नेदेखि स्वाधीन संयुक्त सरकार गठन र जनसंविधान निर्माणसम्मका माग अघि सारेको छ । पार्टीका अनुसार आसन्न फागुन २१ गतेका लागि घोषित संसदीय चुनाव स्थगित गर्नुपर्ने, सर्वदलीय राजनीतिक सम्मेलन गठन गर्नुपर्ने र स्वाधीन संयुक्त सरकार निर्माण गर्नुपर्ने उल्लेख गरिएको छ । जनसंविधान निर्माण गरी अघि बढ्ने तथा त्यसका लागि राष्ट्रिय एकता कायम गर्नुपर्ने पार्टीको माग छ । त्यस्तै, पार्टीले ‘साम्राज्यवादी डिजाइन’ अन्तर्गत हुन लागेको चुनाव खारेज गर्न, राष्ट्रिय स्वाधीनताको रक्षा गर्न र साम्राज्यवादी हस्तक्षेपको विरोध गर्नुपर्ने जनाएको छ । स्वास्थ्य, शिक्षा र यातायात निःशुल्क गर्न, भ्रष्टाचार, महँगी र कालोबजारी अन्त्य गर्न पनि माग गरिएको छ ।
उद्योगधन्दा र कलकारखाना स्थापना गरी देशलाई आत्मनिर्भर बनाउने, २०४६ सालदेखि राज्य सञ्चालन गरेका नेता तथा उच्चपदस्थहरूको सम्पत्ति छानबिन गर्ने र दलीय पुँजीवादी राज्यव्यवस्था खारेज गरी वैज्ञानिक समाजवादको स्थापना गर्ने जस्ता विषय पनि मागसूचीमा समेटिएका छन् । स्वास्थ्य र शिक्षामा भएको निजीकरण अन्त्य गर्न, सुकुम्बासी र भूमिहीन किसानलाई जमिनको व्यवस्था गर्न, भ्रष्ट नेता–नौकरशाहले विदेशमा जम्मा गरेको रकम फिर्ता गर्न र बैंक तथा वित्तीय संस्थामार्फत हडपिएको सम्पत्ति फिर्ता गरिनुपर्ने पार्टीको भनाइ छ । कृषिमा आधुनिकीकरण र औद्योगिकीकरणमार्फत राष्ट्रिय पुँजीको विकास गर्ने तथा सबैका लागि स्वास्थ्य बिमा ग्यारेन्टी गर्ने माग पनि गरिएको छ। साथै, विगत फागुन २३ र २४ गतेको जनआन्दोलनका मूल उद्देश्य पूरा गर्नुपर्ने उल्लेख गरिएको छ । पार्टीले बन्दलाई सफल बनाउन सर्वसाधारण, मजदुर, किसान, विद्यार्थी तथा राष्ट्रप्रेमी नागरिकलाई अपिल गरेको छ ।