काठमाडौं, ४ फागुन २०८२ — नेपाल कम्युनिस्ट पार्टी (बहुमत) ले नेपाली सेना दिवसको अवसरमा टुँडिखेलमा आयोजित सैनिक परेडमा संयुक्त राज्य अमेरिकाको इन्डोप्यासिफिक कमान्ड अन्तर्गतको इन्फेन्ट्री टुकडी सहभागी भएकोप्रति आपत्ति जनाएको छ । पार्टीको केन्द्रीय समितिद्वारा जारी प्रेस वक्तव्यमा उक्त सहभागितालाई नेपालको सार्वभौमिकता र स्वाधीनतामाथिको हस्तक्षेपको रूपमा व्याख्या गरिएको छ । वक्तव्यमा देशमा संसदीय व्यवस्था अन्तर्गत कथित मध्यावधि चुनावको प्रक्रिया चलिरहेको अवस्थामा अमेरिकी सेनाको इन्डोप्यासिफिक कमान्ड प्रमुख तथा चार तारे जनरल सामुएल जे. पापारोसमेत केही दिनदेखि नेपालमा उपस्थित रहेको सन्दर्भ उल्लेख गरिएको छ ।
पार्टीले अमेरिकी सेनाको टुकडीले परेड तथा ब्याण्ड प्रस्तुति दिएको घटनालाई गम्भीर विषयका रूपमा लिँदै यसलाई प्रत्यक्ष सैन्य हस्तक्षेपको संकेत ठहर गरेको छ । साथै, अमेरिकाले यस्ता सैन्य हस्तक्षेपकारी गतिविधि तत्काल बन्द गर्नुपर्ने माग गरिएको छ ।