काठमाडौं । नेपाल कम्युनिस्ट पार्टी (बहुमत)ले आफ्ना महासचिव धर्मेन्द्र बास्तोला ‘कञ्चन’ र काभ्रे जिल्ला सचिव विष्णु तिमिल्सिनालाई सरकारले पक्राउ गरेको भन्दै आपत्ति जनाएको छ । मंगलबार पार्टीका केन्द्रीय कार्यालय सचिव अविरलले प्रेस वक्तव्य जारी गर्दै संगठनात्मक कामका क्रममा रहेका नेताहरूलाई फागुन ५ गते काठमाडौंको खिचापोखरी स्थित टेबहाल क्षेत्रबाट साँझ करिब ५ः४० बजे गिरफ्तार गरिएको जनाएको हो । वक्तव्यमा उल्लेख भएअनुसार देशव्यापी नेपाल बन्दको कार्यक्रम शान्तिपूर्ण रूपमा सम्पन्न भइरहेका बेला नेताहरूलाई निरंकुश शैलीमा पक्राउ गर्नु दमनकारी कदम भएको आरोप लगाइएको छ । पार्टीले यसलाई सरकारको असहिष्णु र निरंकुश प्रवृत्तिको उदाहरणका रूपमा व्याख्या गरेको छ ।
पार्टीले सरकारद्वारा घोषणा गरिएको निर्वाचनले सुशासन, स्थिरता र आत्मनिर्भरता सुनिश्चित गर्न नसक्ने दाबी गर्दै बलजफ्ती रूपमा चुनावी प्रक्रिया अघि बढाइए देशको स्वाधीनतामाथि गम्भीर असर पर्ने चेतावनी दिएको छ । महासचिवको गिरफ्तारीलाई शान्तिपूर्ण राजनीतिक गतिविधिमाथिको हस्तक्षेप र न्यूनतम लोकतान्त्रिक अधिकारको उल्लंघन भएको पनि वक्तव्यमा उल्लेख गरिएको छ । पार्टीले महासचिवसहित पक्राउ परेका सबै नेताहरूको यथाशीघ्र रिहाइको माग गर्दै देशभक्त, प्रगतिशील, वामपन्थी तथा मानवअधिकारवादी संघ–संस्थाहरूलाई रिहाइका पक्षमा पहल गर्न अपिल गरेको छ ।