काठमाडौँ। चार वटा वामपन्थी दल सम्मिलित केन्द्रीय संयुक्त सङ्घर्ष समितिले आगामी संसदीय निर्वाचन बहिष्कार गर्ने घोषणा गर्दै चरणबद्ध आन्दोलनका कार्यक्रम सार्वजनिक गरेको छ । बिहीबार बसेको बैठकले क्रान्तिकारी कम्युनिस्ट पार्टी नेपाल, नेपाल कम्युनिस्ट पार्टी (बहुमत), वैज्ञानिक समाजवादी कम्युनिस्ट पार्टी नेपाल र नेपाल कम्युनिस्ट पार्टी सम्बद्ध नेताहरूको सहभागितामा आन्दोलनका कार्यक्रम तय गरेको जनाएको छ ।
समितिका अनुसार फागुन ८ देखि १२ गतेसम्म गाउँ, टोल र वडासम्म पुगेर निर्वाचन बहिष्कारको पक्षमा पर्चा वितरण, घरदैलो अभियान तथा कोणसभा सञ्चालन गरिनेछ । त्यसैगरी फागुन १३ देखि १८ गतेसम्म स्थानीय परिस्थितिअनुसार इटहरी, जनकपुर, चितवन, काठमाडौँ, बुटवल, दाङ, बर्दिया र धनगढी लगायतका सहरहरूमा बहिष्कार सभा आयोजना गर्ने निर्णय गरिएको छ ।
बैठकले सुशीला कार्की नेतृत्वको सरकारले नेताहरू धर्मेन्द्र बास्तोला र ऋषि कट्टेललाई पक्राउ गरेको घटनाप्रति आपत्ति जनाउँदै उनीहरूको अविलम्ब रिहाइको माग गरेको छ । समितिले उक्त गिरफ्तारीलाई राजनीतिक प्रतिशोधको रूपमा व्याख्या गर्दै आन्दोलनलाई थप सशक्त बनाउने चेतावनीसमेत दिएको छ ।