काठमाडौं, ११ फागुन । पोखराबाट काठमाण्डौतर्फ आउँदै गरेको यात्रु बस धादिङमा त्रिशूली नदी किनारमा खस्दा १७ जनाको ज्यान गएको छ । मृत्यु हुनेमा ६ महिला र ११ पुरुष रहेका छन् भने २७ जना घाइते भएका छन् । धादिङका प्रमुख जिल्ला अधिकारी विजयराज सुवेदीका अनुसार मृतक तथा घाइतेहरूको परिचय खुल्ने क्रम जारी छ । दुर्घटनामा एक जना न्यूजिल्याण्डका नागरिकसहित केही विदेशी पर्यटक पनि परेको जानकारी दिइएको छ । पृथिवी हाइवे अन्तर्गत पोखराबाट काठमाडौंतर्फ आउँदै गरेको ग २ ख १४२१ नम्बरको बस राति करिब १ बजे वेनीघाट रोराङ गाउपालिका–५ भैंसेगौंडा नजिक सडकबाट करिब ३०० मिटर तल खसेको थियो। बस त्रिशूली नदी किनारमा क्षतिग्रस्त अवस्थामा फेला परेको थियो ।
घटनास्थलबाट घाइतेहरूलाई डुंगाको सहायताले करिब एक किलोमिटर तलसम्म सारेर, त्यहाँबाट सडकमा उकालो लगाई एम्बुलेन्समार्फत विभिन्न अस्पताल पठाइएको थियो । अप्ठेरो भू–भाग र उद्धार सामग्रीको अभावका कारण उद्धारकार्यमा कठिनाइ भएको प्रमुख जिल्ला अधिकारी सुवेदीले बताएका छन् । पर्याप्त सामग्री नभएको महसुस भयो,” उनले भने । दुर्घटनास्थलमा नेपाल आर्मी, नेपाल पुलिस र एपिएफ नेपालका सुरक्षाकर्मी परिचालित थिए । सशस्त्र प्रहरी बलको विपद् व्यवस्थापन बेस आदमघाटबाट प्रहरी नायब उपरीक्षक सुनिल गिरीको नेतृत्वमा टोली खटिएको थियो भने विपद् व्यवस्थापन तालिम शिक्षालय कुरिनटारबाट गोताखोरसहितको टोलीले पनि उद्धारमा सहयोग गरेको थियो । दुर्घटनाको कारणबारे अनुसन्धान भइरहेको जनाइएको छ ।