काठमाडौं । नेपाल कम्युनिस्ट पार्टी (बहुमत) ले धादिङमा भएको बस दुर्घटनाप्रति गहिरो दुःख व्यक्त गर्दै मृतकप्रति श्रद्धाञ्जली अर्पण गरेको छ । पार्टीका केन्द्रीय कार्यालय सचिव अविरलद्धारा सोमबार प्रेस वक्तव्य जारी गर्दै पोखराबाट काठमाडौं आउँदै गरेको यात्रुबस धादिङ जिल्लाको बेनिघाट–रोराङ गाउँपालिका–५, भैँसेगौडा नजिक सडकबाट करिब ३०० मिटर तल त्रिशूली नदी मा खस्दा १९ जनाको मृत्यु र २५ जना घाइते भएको घटनाले स्तब्ध बनाएको जनाएको छ ।
पार्टीले उक्त दुर्घटनामा परी घाइते भएकाहरूको स्वास्थ्यलाभको कामना गर्नुका साथै मृतक परिवारजनप्रति गहिरो समवेदना प्रकट गरेको छ । पीडित परिवारलाई आवश्यक सहयोग गर्न र उनीहरूको जीवनलाई सहज बनाउन पार्टी पंक्तिलाई परिचालित हुन सम्बन्धित जिल्लाका पार्टी कमिटीलाई निर्देशन दिइएको वक्तव्यमा उल्लेख छ । साथै राज्यका संयन्त्रलाई उद्धार तथा उपचार कार्य प्रभावकारी बनाउन पार्टीले जोडदार माग गरेको छ ।
पार्टीले भ्रष्टाचारका कारण गुणस्तरहीन सडक निर्माण, सवारी साधनको प्राविधिक परीक्षणमा लापरबाही तथा सडक अनुशासनको उल्लंघनजस्ता कारणले यस्ता दुर्घटना दोहोरिने गरेको उल्लेख गर्दै यस्ता कमजोरीको तत्काल सुधार गर्न सरकारसँग माग गरेको छ ।