काठमाडौँ — सम्भावित अमेरिकी सैन्य हस्तक्षेपको चर्चा चुलिँदै जाँदा भारत सरकारले इरानमा रहेका आफ्ना नागरिकलाई देश छोड्न औपचारिक आग्रह गरेको छ । क्षेत्रीय सुरक्षाको अवस्था संवेदनशील बन्दै गएको मूल्यांकन गर्दै भारतको विदेश मन्त्रालयले उपलब्ध व्यावसायिक उडान वा अन्य यातायातका साधन प्रयोग गरी सुरक्षित रूपमा स्वदेश फर्किन अनुरोध गरेको हो ।
तेहरानस्थित भारतीय दूतावासले सामाजिक सञ्जालमार्फत सूचना जारी गर्दै इरानमा बसोबास गरिरहेका भारतीय नागरिक तथा भारतीय मूलका व्यक्तिलाई उच्च सतर्कता अपनाउन आग्रह गरेको छ । दूतावासले सम्भावित विरोध–प्रदर्शन वा भीडभाड हुने स्थानबाट टाढा रहन, दूतावाससँग नियमित सम्पर्कमा रहन तथा स्थानीय सञ्चारमाध्यमबाट अद्यावधिक जानकारी लिइरहन पनि सुझाव दिएको छ ।
भारतको विदेश मन्त्रालयका अनुसार हाल इरानमा झण्डै १० हजार भारतीय नागरिक रहेका छन् । विकसित परिस्थितिका कारण उनीहरूको सुरक्षालाई पहिलो प्राथमिकतामा राखिएको सरकारी भनाइ छ ।