काठमाडौँ, फागुन १२ । नेपाल कम्युनिष्ट पार्टी (बहुमत) ले पार्टी महासचिव धर्मेन्द्र बास्तोला ‘कञ्चन’लगायतका नेता कार्यकर्ताहरूलाई गरिएको गिरफ्तारीको विरोधमा देशव्यापी रूपमा मशाल जुलुस गरेको छ । सरकारले “विनाकारण” पार्टी महासचिव सहितका नेताहरू र जनबर्गीय संगठनका विभिन्न तहका नेताहरुलाई गिरफ्तार गरिएको भन्दै पूर्वघोषित कार्यक्रमअनुसार नै देशका विभिन्न जिल्लामा मशाल जुलुस गरिएको पार्टीका एक सचिवालय सदस्यले जनमेललाई बताए । देशको भूराजनीतिक अवस्थालाई मध्येनजर गरेर आसन्न चुनाव स्थगन गरी स्वाधीन संयुक्त सरकार गठन पश्चात जनसंविधान निर्माण गर्ने बाटो नै अहिलेको उक्तम राजनीतिक निकास भएको भनी पार्टीले भन्दै आएको छ । त्यसको लागि घोषित संघर्षका कार्यक्रमहरु लागु गरिरहेको छ ।
पार्टीले महासचिव बास्तोलासहित गिरफ्तार सबै नेता कार्यकर्ताहरूको अविलम्ब रिहाइ गरि संविधान प्रदत्त व्यक्तिको राजनीतिक अधिकारलाई सुनिश्चित गर्न आग्रह गरेको छ । चुनावमा भाग लिने वा बहिष्कार गर्ने व्यक्तिको अधिकारको विषय हो । यो लोकतान्त्रिक अधिकारबाट बञ्चित गराईनुले सरकार देशलाई द्धन्दतिर धकेलिरहेको उक्त पार्टीको विश्लेषण छ ।