काठमाडौँ । नेपाल कम्युनिष्ट पार्टी (बहुमत) ले इरानमाथि भएको अमेरिकी आक्रमणको कडा शब्दमा विरोध जनाएको छ । पार्टीको केन्द्रीय समितिद्वारा जारी प्रेस वक्तव्यमा उक्त आक्रमणलाई साम्राज्यवादी हस्तक्षेपको निरन्तरता भएको ठहर गर्दै विश्व शान्ति र राष्ट्रिय स्वाधीनतामाथि गम्भीर चुनौती खडा भएको उल्लेख गरिएको छ । वक्तव्यमा अमेरिकाले विगतदेखि नै विभिन्न देशमाथि आर्थिक, राजनीतिक तथा सैनिक हस्तक्षेप गर्दै आएको आरोप लगाइएको छ । इरानमाथिको आक्रमण त्यसैको पछिल्लो कडी भएको दाबी गर्दै पार्टीले यसले विश्वलाई थप अस्थिरतातर्फ धकेल्ने जनाएको छ ।
पार्टीले विश्वका श्रमजीवी, उत्पीडित तथा प्रगतिशील शक्तिहरूलाई साम्राज्यवादविरुद्ध एकजुट हुन आह्वान गरेको छ । साथै, धार्मिक अतिवाद र साम्राज्यवादी हस्तक्षेप दुबै विश्व शान्तिका लागि खतरा भएको उल्लेख गर्दै आपसी युद्ध र द्वन्द्वले आम जनतालाई मात्र क्षति पुर्‍याउने बताइएको छ ।
वक्तव्यमा अमेरिका–इरान तनावको असर खाडी क्षेत्रमा रहेका नेपाली नागरिकहरूमा पनि पर्न सक्ने भन्दै उनीहरूको सुरक्षा र स्वदेश फिर्तिप्रति सरकार गम्भीर बन्नुपर्ने माग गरिएको छ । विदेशमा रहेका नेपालीको सुरक्षाको प्रत्याभूति गर्न, आवश्यक परे उद्धार गर्न र राष्ट्रिय हित तथा स्वाधीनताको रक्षा गर्न ठोस कदम चाल्न सरकारसँग आग्रह गरिएको छ ।